Günü-gündən abadlaşan Bakının gözəlliyinə biganə qala bilməyən dünya mətbuatı paytaxtımızın gözəl binalarını və memarlıq nümunələrini vəsf edərək, onu Parisin və Dubayın xələfi adlandırır.
Hər kəsi valeh edən Bakının siması günü-gündən dəyişir. Heyranedici görünüşü, müasirliyi və inkişafı ilə ölkəmizə gələn xarici qonaqları heyrətləndirir. Elə məhz bu səbəbdən də istər turizm, istərsə də iqtisadi baxımdan paytaxtımız bir çox dünya ölkələrinin diqqət mərkəzindədir.
Məlumat üçün bildirək ki, Bakı şəhərinin sosial-iqtisadi inkişafında 12 rayonun hər birinin öz payı və yeri var. Sosial-iqtisadi inkişafına görə Qaradağ rayonu hər zaman seçilir.
Mavi gözlü Xəzərin sahilində yerləşən Qaradağ rayonunun inzibati ərazi vahidi kimi yaradılmasından 95 il ötür. Hazırda Qaradağ rayonunun inzibati ərazi vahidliyinə 11 qəsəbə daxildir. Qaradağ rayonunun mərkəzi şəhər tipli Lökbatan qəsəbəsidir. Hazırda Qaradağ rayonunun ərazisi 1080 kv. km və əhalisi 123614 nəfərdir.
Qaradağ rayonu hazırda günbəgün yeniləşir, inkişaf edir, ölkə miqyasında aparılan abadlıq və quruculuq işlərinə öz layiqli töhfəsini verir.
Hazırda Qaradağ rayonunda gedən sürətli sosial-iqtasadi inkişafdan danışarkən, ilk öncə belə bir vacib məqamı da qeyd etmək lazımdır ki, ölkə başçısı İlham Əliyev hələ ötən əsrin 90-cı illərinin ortalarında Qaradağ rayonundan millət vəkili kimi fəaliyyət göstərib. Həmin illərdə Qaradağ rayonunda da çoxlu işlər görülüb.
Xatırladaq ki, sosial-iqtisadi inkişaf proqramı da Prezident İlham Əliyevin təşəbbüsü və iştirakı ilə məhz Qaradağ rayonunda qəbul edilib və “Qaradağın sosial-iqtisadi inkişafına yardım fondu” çərçivəsində rayonda böyük həcmdə layihələr həyata keçirilib.
Qaradağ rayonunda sənaye ən dinamik inkişaf edən sahədir
Məlumat üçün bildirək ki, Azərbaycan Prezidentinin 2015-ci il 3 iyun tarixli, 1255 nömrəli Sərəncamına əsasən, ölkədə qeyri-neft sektorunun davamlı inkişafının təmin edilməsi, sahibkarlığın dəstəklənməsi, müasir texnologiyalara əsaslanan rəqabətqabiliyyətli sənaye istehsalının təşkili və əhalinin istehsal sahəsində məşğulluğunun artırılması məqsədilə Bakı şəhərinin Qaradağ rayonu ərazisində Qaradağ Sənaye Parkı yaradılıb. Qaradağ Sənaye Parkının bir rezidenti var, bu da "Bakı Gəmiqayırma Zavodu" MMC-dir.
Son illərdə Qaradağ rayonunda genişmiqyaslı islahatların həyata keçirilməsi, yeni müəssisələrin yaradılması nəticəsində iqtisadiyyatın aparıcı sahəsi olan sənayedə əhəmiyyətli nəticələr əldə olunub. 2017-ci ilin birinci yarısında da, əvvəlki dövrlərdə olduğu kimi, sənaye ən dinamik inkişaf edən sahə olub.
Azərbaycan Respublikası regionlarının sosial-iqtisadi inkişafına dair Dövlət Proqramının icrası ilə bağlı görülən işlər, bu sahədə aparılan digər tədbirlər rayonda qeyri-neft sahələrinin və emal sənayesinin inkişafına təkan verib. Fəaliyyət göstərən sənaye müəssisələri tərəfindən 2017-ci il ərzində 459,3 milyon manatlıq sənaye məhsulu istehsal edilib və xidmətlər göstərilib ki, bu da əvvəlki ilin müvafiq dövrü ilə müqayisədə 20,1 faiz çoxdur. Rayon üzrə fəaliyyət göstərən mədənçıxarma sənaye müəssisələri tərəfindən isə bu ilin yanvar-iyun aylarında 199,8 milyon manatlıq məhsul istehsal olunub.
Onu da bildirək ki, sənayenin inkişafında qeyri-dövlət sektorunun fəaliyyəti mühüm əhəmiyyət kəsb edir. Qeyri-dövlət subyektləri tərəfindən 2017-ci ilin yanvar-iyun ayları ərzində 202,5 milyon manatlıq məhsul istehsal edilib və xidmətlər göstərilib ki, bu, ümumi məhsulun 44,1 faizi qədərdir.
Qaradağa yatırılan investisiyalar
Sevindirici haldır ki, Qaradağ rayonuna yatırılan investisiyanın həcmi ildən-ilə artır.Tək yerli iş adamları deyil, xarici investorlar da Qaradağ rayonuna investisiya yatırmaqda maraqlıdırlar. Açıqlanan statistik rəqəmlərə əsasən, ötən il rayon iqtisadiyyatına 150,1 milyon manatlıq investisiya qoyulub. Məlumat üçün bildirək ki, investisiyanın 27,5 faizi, yəni 41,3 milyon manatı tikinti-quraşdırma işlərinin yerinə yetirilməsinə sərf edilib.
Qeyd etdiyimiz kimi, Qaradağ rayonuna xarici şirkətlər investisiya yatırmağa maraq göstərirlər. Qaradağ rayonu Çinin bir sıra vilayətləri ilə iqtisadi və mədəni əlaqələri genişləndirib, qarşılıqlı səfərlər və işgüzar görüşlər keçirilib, əməkdaşlığın inkişaf etdirilməsinə dair müvafiq razılaşmalar əldə edilib.
Belə ki, ötən müddət ərzində Rusiya Federasiyasının Volqoqrad, Ukrayna Respublikası Kiyev vilayətinin İrpen, Hollandiyanın Rotterdam şəhəri, Çin Xalq Respublikasının Çunçinq şəhərinin Çuzulunpo, Dalyan şəhərinin Yeni Cunpi rayonları və Şenzen şəhəri ilə, həmçinin, Koreya Respublikasının Seul şəhərinin Yonqsan rayonu ilə “Dostluq və əməkdaşlıq haqqında” Memorandum imzalanıb.
Bakı şəhəri Qaradağ rayonunun Ələt qəsəbəsində 1000 hektar ərazidə, ümumi dəyəri ilkin olaraq 2 milyard manat olmaqla “Azərbaycan-Çin Azad İqtisadi Sənaye Şəhərciyi”nin yaradılması məqsədilə Qaradağ Rayon İcra Hakimiyyətinin başçısı Süleyman Mikayılov və Şenjen Şəhər Regional İqtisadi Əməkdaşlıq Assosiasiyasının prezidenti Chen Zhiyong saziş imzalayıblar.
Qaradağ rayonunda aparılan abadlıq-quruculuq işlərinin rayon sakinlərinə təsiri
Qaradağ rayonunun təhsil, səhiyyə, mədəniyyət, eləcə də idman və gənclər siyasəti sahəsində əldə etdiyi nəticələr də ürəkaçandır. Son illər dövlətimizin adıçəkilən sahələrə qayğı və diqqəti nəticəsində rayonda yeni təhsil, səhiyyə, mədəniyyət və idman obyektləri inşa edilərək sakinlərin ixtiyarına verilib. Bundan əlavə, bir sıra obyektlərdə əsaslı təmir və bərpa işləri həyata keçirilib.
Qaradağ rayonu sakinlərinin onlar üçün yaradılan abadlıq-quruculuq işlərindən razı qaldıqları simalarından hiss olunur. Fikrət Əliyev adlı Qaradağ rayon sakini bizimlə söhbətində son illər rayonda aparılan islahatlar haqqında danışdı: “Rayon İcra Hakimiyyətinin başçısı mütəmadi olaraq rayon sakinləri ilə görüşür və onların problemlərinin həllində köməyini əsirgəmir. Rayonun bütün qəsəbələrində sürətli tikinti-quruculuq və abadlıq işləri aparılır. Bu sahədə görülən işlər rayon sakinlərinin kommunal sahədə, o cümlədən digər sosial sahələrdə mövcud olan bir sıra problemlərini artıq həll edib. Həmçinin, rayonun qəsəbələrarası və məhəllədaxili yollarında, mərkəzi küçələrində, yaşayış binalarının fasad və dam örtüklərində, park və meydanlarda, həmçinin, digər infrastruktur sahələrində yenidənqurma və əsaslı təmir işləri aparılıb və bu istiqamətdə işlər bu gün də uğurla davam etdirilir”.
Məlumat üçün onu da bildirək ki, Qaradağ rayonunun Lökbatan qəsəbəsi, Bilal Niftəliyev küçəsi 17, 27 saylı və Ələt qəsəbəsi Sülh küçəsi 1 saylı yaşayış binalarının ətrafında geniş abadlıq və yenidənqurma işləri həyata keçirilib. Görülən işlər nəticəsində rayonun Ələt qəsəbəsində 9 yaşayış binasının fasadı təmir olunaraq 5670 kv.m. suvaq-emulsiya işləri, Lökbatan qəsəbəsində isə 3 binanın fasadında 12140 kv.m. suvaq-emulsiya işləri görülüb, 2 uşaq meydançası və 14 kölgəlik quraşdırılıb. Yeni istifadəyə verilmiş abad məhəllələrə 1650 kv.m. yeni yaşıllıq sahəsi salınıb, 510 ədəd dekorativ ağac əkilib və ətrafına ümumilikdə 3880 kv.m. asfalt örtüyü salınıb.
Hazırda rayonun bir sıra qəsəbələrində mövcud olan yaşayış binalarının ətrafında abadlıq və quruculuq işləri davam etdirilməkdədir.
Məcburi köçkün və qaçqın ailələri diqqət mərkəzindədir...
Qaçqın və məcburi köçkünlərin sosial vəziyyətinin yaxşılaşdırılması, problemlərinin öyrənilməsi və vaxtında həlli, mənzil-məişət şəraitlərinin yaxşılaşıdırılması daim dövlətin xüsusi diqqət mərkəzindədir. Qaradağ rayonu ərazisində məskunlaşan 12 873 nəfər və ya 3 028 məcburi köçkün və qaçqın ailəsinin yaşayış və məişət şəraitinin yaxşılaşdırılması, onların sosial problemlərinin həlli məsələləri də Rayon İcra Hakimiyyətinin daim diqqət mərkəzindədir. Lökbatan qəsəbəsində məcburi köçkünlərin kompakt məskunlaşdıqları bəzi binaların dam örtükləri təmir edilib, su, kanalizasiya xətləri dəyişdirilib.
Xatırladaq ki, ötən il Qaradağ rayonunun Lökbatan qəsəbəsində qaçqın və məcburi köçkün ailələri üçün 1026 mənzilli yeni yaşayış kompleksinin təməlqoyma mərasimi keçirilib. Xüsusilə vurğulamaq lazımdır ki, Birinci vitse-prezidenti Mehriban xanım Əliyeva da həmin mərasimdə iştirak edib. Ölkəmiz üçün çox vacib olan bu məsələyə, qaçqın və məcburi köçkünlərin həyat şəraitinin yaxşılaşdırılmasına Azərbaycan Respublikasının Birinci vitse-prezidenti Mehriban xanım Əliyevanın çağırışı ilə Qaradağ rayonunda fəaliyyət göstərən özəl sektor və biznes strukturları da qoşulublar.
Qaradağ rayonunun sosial-iqtisadi inkişafından danışan millət vəkili Aydın Hüseynov bizimlə söhbətində qeyd etdi ki, adıçəkilən rayon son illər iqtisadi inkişaf baxımından inkişaf edir: “Qaradağın sosial-məişət infrastrukturu da yenidən qurulur və yaxın illərdə qaradağlıların ehtiyaclarının ödənilməsində bu, önəmli rol oynayacaq. 2007-ci ildə Bakı şəhərinin və Abşeron yarımadasının enerji təhlükəsizliyinin möhkəmləndirilməsi üçün nəzərdə tutulan 300 meqavat gücündə modul tipli Səngəçal elektrik stansiyasının, müasir Gəmiqayırma zavodunun, Beynəlxalq Dəniz Ticarəti Limanının, Cənubi Qafqazda ən nəhəng özəl müəssisələrdən olan Metanol zavodunun, “Holcim-Azərbaycan”, “Norm” yeni sement, “Mətanət-A” şirkətinin yeni Ağdağ gips zavodlarının və bir sıra digər sənaye obyektlərinin tikintisi bu sahədə atılan sanballı addımlar idi. Artıq bu layihələr öz müsbət bəhrəsini verməkdədir”.
Sonda əminliklə demək olar ki, Qaradağ rayonunun sosial-iqtisadi inkişafı, əhalinin həyat səviyyəsinin yaxşılaşdırılması, geniş abadlıq və quruculuq işlərinin aparılması bundan sonra da uğurla davam etdiriləcək.
Günel CƏLİLOVA
Yazı Qaradağ Rayon İcra Hakimiyyəti və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim edilir.
