Aydın Hüseynov: “Qeyri-neft sektorunun inkişaf etməsi onu deməyə əsas verir ki, Bakı doğrudan da dünyanın ən iri maliyyə mərkəzlərindən biridir”
“Global Financial Centres Index” (GFCI) dünyanın ən iri maliyyə mərkəzlərinin reytinq cədvəlini açıqlayıb. Sevindirici haldır ki, Bakı dünyanın ən iri maliyyə mərkəzlərinin siyahısına daxil edilib. Hesabata görə, Böyük Britaniyanın Avropa İttifaqını tərk etməklə bağlı qərarına baxmayaraq, ölkənin bank sektorunda neqativə doğru heç bir dəyişiklik baş verməyib.
Nyu-York (793 bənd) Londondan sonra ikinci sırada yer alıb. Siyahıda üçüncü yeri Honq-Konq (781 bənd) tutub. Onluğa Şanxay, Toronto, San-Fransisko, Sidney və Boston daxil edilib. Sürix və Pekin isə ilk onluğu tərk ediblər.
Qeyd edək ki, Bakı ilk dəfə siyahıya daxil edilib və maliyyə mərkəzləri arasında 511 bəndlə 95-ci olub. Ümumiyyətlə, Bakı və Astana ilk iştirakçılar kimi siyahıya daxil ediliblər.
Məlumat üçün bildirək ki, “Global Financial Centres Index”i ilk dəfə 2007-ci ildə hazırlanıb. Dünyanın ən iri maliyyə mərkəzlərinin reytinq cədvəlində Bakının adının yer almasına münasibət bildirən millət vəkili Aydın Hüseynov “Bakı-Xəbər”ə açıqlamasında bunları qeyd etdi: “Dünyanın məşhur maliyyə mərkəzinin reytinq cədvəlində Bakının adının yer alması həm sevindiricidir, həm də gözləniləndir. İlk olaraq bildirim ki, Bakı tarixi abidələrlə zəngin gözəl bir şəhərdir. Paytaxt ərazisində nüfüzlu tədbirlər keçirilməkdə davam edir. Bakı beynəlxalq yarışlara, elmi konfranslara, tədbirlərə və digər layihələrə evsahibliyi edir”.
Həmsöhbətimiz onu da əlavə etdi ki, Bakı-Tiflis-Qars dəmir yolunun işə düşməsinin Bakının dünyanın ən iri maliyyə mərkəzlərinin siyahısına daxil olmasında öz töhfəsi var: “Həmçinin, Dəniz Ticarət Limanı, TANAP və TAP layihəsi, “Şahdəniz 2” layihəsi və o cümlədən “Əsrin müqaviləsi”nin vaxtının uzadılması kimi layihələr maliyyə tutumludur. Gələcəkdə paytaxt ərazisində Azad İqtisadi Zonanın fəaliyyət göstərməsi Bakının imicinə daha da müsbət təsir edəcək”.
Millət vəkilinin sözlərinə görə, xarici turistlərin istirahət üçün ölkəmizi seçməsi ölkəmizin beynəlxalq aləmdə imicinə müsbət təsir göstərir: “Turist sayının artması ilk növbədə ölkə büdcəsinə valyuta daxil olmasına səbəb olur. Əcnəbi turistlərin xüsusi olaraq Bakını seçməsi, paytaxt ərazisində istirahət etməsi beynəlxalq maliyyə təşkilatlarının marağına səbəb olur. Qeyri-neft sektorunun inkişaf etməsi onu deməyə əsas verir ki, Bakı doğrudan da dünyanın ən iri maliyyə mərkəzlərindən biridir”.
Günel CƏLİLOVA
