Fikrət Yusifov: “Bakı-Tiflis-Qars dəmir yolu, “Şimal-Cənub” nəqliyyat dəhlizi kimi layihələr ölkəni bölgənin ən iri logistika mərkəzinə çevirəcək”
Azərbaycan iqtisadiyyatının sürətlə inkişaf etməsi danılmaz reallıqdır. Reallıq ondan ibarətdir ki, ölkə iqtisadiyyatının bütün sahələrində dinamik inkişaf var. On il əvvəl əsasən enerji sektoru inkişaf edirdisə, artıq iqtisadiyyatın qeyri-neft sektorunda inkişaf yaşanır. Bu sahədə ilbəil iqtisadi artım özünü göstərir. Artıq bir sıra xarici ekspertlər də Azərbaycan iqtisadiyyatının inkişafını xüsusu qeyd edirlər.
Politoloq, Moskva Dövlət Universiteti nəzdində Postsovet məkanının tədqiqi İnformasiya-Analitika Mərkəzinin direktor müavini Aleksandr Karavayev hesab edir ki, yaxın bir neçə il ərzində Azərbaycan neft-qaz sənayesindən böyük gəlirlərin əldə olunduğu iqtisadiyyatdan qeyri-xammal sektoruna yönəlmiş iqtisadiyyata keçid məqsədilə ixracın diversifikasiyası məsələsini həll edəcək. Ekspertin fikrincə, əsas inkişaf üç istiqamətdə - aqrar sənaye, logistika və nəqliyyat kommunikasiyaları, eləcə də kiçik və orta biznesin dəstəklənməsi sahəsində davam edəcək:
“Nəqliyyat kommunikasiyalarının inkişafı Azərbaycanın nəqliyyat qovşağına çevrilməsi məcrasında davam edəcək”.
A.Karavayevin sözlərinə görə, çox vacib inkişaf xətti kiçik və orta biznesin dəstəklənməsidir, çünki ixrac potensialının əsası məhz bu səviyyədə qoyulur: “Beynəlxalq bazarlara ağır sənayedə fəaliyyət göstərən iri şirkətlər vasitəsilə çıxış əldə etmək çətindir. Azərbaycan iki istiqaməti ilə - neft və aqrar sənaye sahələri ilə tanınır. Elə bu iki sahə üzrə də böyük uğurlara nail olmaq olar. Bunun üçün bu sahələrin inkişafını doğru istiqamətə yönləndirmək kifayətdir”.
Rusiyalı ekspert onu da əlavə edib ki, gələcəkdə ölkə idarəetməsində və ümumilikdə iqtisadiyyatda islahatlar gözlənir: “Nazirliklərin formatları dəyişdirilir, yeni agentliklər yaranır, qurumlar birləşir. Nəqliyyat, Rabitə və Yüksək Texnologiyalar Nazirliyi iki nazirliyin birləşdirilməsi yolu ilə yaradılıb. Bu qurumlar məhsulu elektron ticarət platformalarına çıxarmağa imkan verən sistemin yaradılması və nəqliyyat və logistikanın bir qurumdan idarə olunması məqsədilə birləşdirilib”.
Ümumilikdə, Azərbaycanda inkişafın əsasən 3 istiqamət üzrə gedəcəyinə ekspertlər necə yanaşırlar?
Məsələyə münasibət bildirən “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifovun fikrincə, səslənən fikirlər reallığa əsaslanır: “Karavayevin fikiləri ilə tam razıyam. Ancaq bir həqiqət var. O da ondan ibarətdir ki, bu gün Azərbaycan hökuməti real sektorun bütün sahələrinin sürətli inkişafını təmin etməyə çalışır. Hansısa bir sahənin prioritet elan olunduğunu kim deyə bilər? Bizdə son zamanlar bir il sənaye ili, digər il kənd təsərrüfatı ili elan olundu. Ölkədə turizmin inkişafı üçün çox mühüm dövlət proqramları reallaşdırılır. Tranzit yükdaşımalar sahəsində çox böyük transmilli layihələr həyata keçirilir. Bakı-Tiflis-Qars dəmir yolu, “Şimal-Cənub” nəqliyyat dəhlizi kimi layihələr Azərbaycanı bölgənin ən iri logistika mərkəzinə çevirəcək. Azərbaycan hökuməti son iki ildən artıq bir müddətdə ölkədə sahibkarlığın inkişafına maneə ola biləcək bütün neqativ halların aradan qaldırılması istiqamətində ən təsirli addımlar atıb. Belə olan halda, hansısa bir sahənin və ya bir neçə sahənin əsas istiqamət kimi dəyərləndirilməsi bir qədər düzgün deyil. Hökumət real sektorun bütün istiqamətlərində ən yüksək nəticələr əldə etməyi hədəfləyib. Ən böyük həqiqət bundan ibarətdir. Hesab edirəm ki, bu istiqamətdə görülən işlər, atılan addımlar, həyata keçirilən islahatlar öz bəhrəsini verəcək. Nəticədə ölkə iqtisadiyyatının sadalanan sahələri ilə yanaşı, digər sahələri də inkişaf edəcək”.
Vidadi ORDAHALLI
