Vüqar Bayramov: "Mərkəzi Bank real sektora ayrılan kreditin həcminin artırılmasına nail olmalıdır"
Məlumata görə, Azərbaycan iqtisadiyyatına kredit qoyuluşları 5% azalıb. Qeyd olunur ki, Azərbaycan iqtisadiyyatına məcmu kredit qoyuluşlarının həcmi 2017-ci il martın 1-nə 15 424,2 mln. manat təşkil edib.
Azərbaycan Mərkəzi Bankının yaydığı məlumata əsasən, kredit qoyuluşlarının həcmi fevral ayının 1-nə olan göstərici ilə müqayisədə 826,6 mln. manat və ya 5,09 % azalıb. Keçən ilin analoji dövrü ilə müqayisədə isə iqtisadiyyata kredit qoyuluşlarının həcmi 4 307,7 mln. manat və ya 21,83 % azalıb.
Mövzu ilə əlaqədar ekspertə müraciət etdik. İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, kredit qoyuluşunda azalma real sektorda və istehlak kreditində müşahidə olunur: "Real sektora yönəldilən kreditlərin həcminin azalması gündəmdədir. Bu sektora qoyulan kreditlərin həcminin artırılması ilə bağlı müəyyən işlər görülür. Hətta ölkə Prezidenti tərəfindən real sektora banklar tərəfindən daha çox kreditin verilməsi xüsusilə qeyd olunub. Prezident kommersiya banklarının real sektorun maliyyələşməsində yaxından iştirak etməsinin vacibliyini qeyd edib".
Həmsöhbətimiz təəssüf hissilə vurğuladı ki, real sektora ayrılan kreditlərin həcmində artım yüksək deyil. Hətta bu sahədə azalmalar müşahidə olunur. Hələ də banklar real sektorun həcminin artırılmasında maraqlı görsənmir.
V.Bayramov istehlak kreditinin həcmində azalmaların müşahidə olunduğunu da dilə gətirdi: "Bunun da məlum səbəbləri var. Çünki kredit şərtləri ağırlaşdırılıb. İş yerindən arayışın tələb olunması, manatın devalvasiyası nəticəsində kredit tarixçəsi pisləşən vətəndaşlarımızın sayı artdı. Bu kimi hallar istehlak kreditlərinin həcminə öz təsirini göstərib".
İqtisadçının fikrincə, Mərkəzi Bank real sektora ayrılan kreditin həcminin artırılmasına nail olmalıdır.
Günel CƏLİLOVA
