Tahir Mirkişili: "2016-cı ildə dövlət tərəfindən atılan stimullaşdırıcı addımlar və ixraca dəstək tədbirləri artıq 2017-ci ilin 1-ci rübündə öz nəticəsini verməyə başlayıb"
Bir vaxtlar kəndlərində yaşayanlar arasında torpaqdan küsüb başqa yerlərə üz tutanlar az olmayıb. Çünki kolxozun aylıq məvacibi bir zamanlar onların təminatını ödəmirdi. Torpaq xalqın milli sərvəti, elin var-dövləti olsa da, təəssüf ki, sovetlər dönəmində bu müqəddəs, toxunulmaz əmanət 1969-cu ilə qədər öz həqiqi sahibindən uzaq salınıb. Təsərrüfatsızlıq üzündən külli miqdarda torpaq dövriyyədən çıxarılıb.
Mərhum prezident Heydər Əliyev 1993-cü ildə hakimiyyətə qayıtdıqdan sonra ötən əsrin 70-80-ci illərində başladığı aqrar islahatları davam etdirdi, bu milli sərvəti onun əsl sahibinə - kəndliyə qaytardı.
Bu gün Prezident İlham Əliyevin düşünülmüş siyasəti nəticəsində Azərbaycanın aqrar sahəsi inkişaf mərhələsindədir. Ölkədə istehsal olunan meyvə-tərəvəzin həcmi ötən illərlə müqayisədə artıb.
Dövlət Gömrük Komitəsinin sədri Aydın Əliyev "IV Caspian Energy" beynəlxalq forumunda çıxış edərkən bildirib ki, Azərbaycana meyvə-tərəvəz idxalı 17 % azalıb, amma əvəzində ixrac 73 % artıb. O qeyd edib ki, gömrük orqanları bu ilin ilk rübündə büdcəyə 154 milyon manat köçürüb: "Bu göstərici ötən ilə nisbətdə 154 milyon manat çoxdur".
A.Əliyevin sözlərinə görə, dünya iqtisadiyyatında baş verən böhran, neft gəlirlərinin azalması və manatın devalvasiyasından sonra Prezident İlham Əliyevin rəhbərliyi altında aparılan iqtisadi islahatlar daha da davamlı xarakter alıb: "Ölkə başçısı son dövrlər gömrük sahəsində şəffaflığın artırılması və gömrük orqanlarının fəaliyyətinin daha da təkmilləşdirilməsi ilə bağlı bir sıra mühüm fərman və sərəncamlar imzalayıb".
İxracın 73 faiz artması ölkə iqtisadiyyatına və daxili bazara necə təsir edəcək? Bu sualla millət vəkili Tahir Mirkişiliyə müraciət etdik. O, "Bakı-Xəbər"ə açıqlamasında qeyd etdi ki, 2016-cı ildə dövlət tərəfindən atılan stimullaşdırıcı addımlar və ixraca dəstək tədbirləri artıq 2017-ci ilin 1-ci rübündə öz nəticəsini verməyə başlayıb: "Tək meyvə-tərəvəz deyil, məsələn, kimya sənayesi məhsulları, elektrik enerjisi, plastmas materialları və s. ixracında xeyli artım qeydə alınıb. İxracın artması ölkəyə əlavə valyuta axınını gücləndirəcək. Eyni zamanda yerli istehsalı stimullaşdırmaqla istehsal həcminin artmasına, istehsalın miqyasının böyüməsinə gətirib çıxaracaq. İdxalın əvəz edilməklə azalması həm ölkədən valyuta çıxmasının qarşısını alacaq, həm də yerli istehsalı stimullaşdıracaq. Bütün bunlar isə manatın kursunun möhkəmlənməsinə, makroiqtisadi sabitliyin təmin edilməsinə və iqtisadi aktivliyin artmasına zəmin yaradır".
Günel CƏLİLOVA
