Ramil Osmanlı: "Əsas məqsədin aztəminatlı ailələrin mənzil probleminin həlli olduğunu nəzərə alsaq, aylıq ödənişlərin həddi 150 manatdan yuxarı olmamalıdır"
Məlum olduğu kimi, sosial mənzillərin satış şərtləri və aylıq ödəniş məbləği açıqlanıb. Mənzilləri ipoteka formasında almaq istəyənlər onun dəyərinin 10 faizini ilkin ödəniş etməklə əldə edəcək. Mayın 1-dən isə sosial evləri almaq üçün elektron müraciətlərə start veriləcək.
Mənzil İnşaatı Dövlət Agentliyinin direktoru Samir Nuriyev sosial mənzillərin tikintisi ilə bağlı açıqlama verib. Direktorun sözlərinə görə, MİDA-nın həyata keçirdiyi layihələrdə aylıq 130-150 manat ödəməklə birotaqlı, 300 manat ödəməklə isə üçotaqlı mənzillərə sahiblənmək mümkün olacaq: "Mənzil təminatı prosesində bazar qiyməti nəzərə alınacaq. Azərbaycan İpoteka Fondu orta bazar qiymətinin hesablanmasını hər 6 aydan bir sifariş edib əldə edir. Biz artıq mənzilləri satışa çıxarmamışdan öncə fond tərəfindən həmin ərazi üzrə orta bazar qiymətini əldə edəcəyik və çalışacağıq ki, həm uzunmüddətli ödəniş baxımından, həm də nağd ödəniş baxımından sərfəli olsun"
S.Nuriyevin açıqlamasından o da məlum olub ki, sosial mənzillərin tikintisi sürətlə davam edir: "Yasamal yaşayış kompleksindəki ilk binanın üçüncü, məktəbin isə ikinci mərtəbəsi tikilməkdədir. Paralel olaraq növbəti 15 binanın tikintisi də başlayıb. Hövsandakı sosial mənzillərin təməli isə yaxın dövrdə qoyulacaq. Sosial mənzilləri almaq üçün qeydiyyat prosesinə gələn aydan start veriləcək".
Sosial evlərlə bağlı aylıq ödənişin 130-300 manat arasında dəyişməsini ekspertlər necə dəyərləndirir? Məsələyə münasibət bildirən əmlak məsələləri üzrə ekspert Ramil Osmanlının fikrincə, bu, aztəminatlı əhalinin mənzil təminatının yaxşılaşdırılmasına müsbət təsir edəcək: "Aztəminatlı ailələrə sosial mənzillər 20, 30, 40, 50 illik veriləcək. Aylıq ödənişlər isə 100-150 manat civarında olacaq. İlkin olaraq proqnozumuza görə, belə sosial evlərin aylıq ödəniş haqqı 130-300 manat civarında olacaq. Burada artıq agentliyin hansı qiymət meyarını seçəcəyi o qədər də əhəmiyyətli deyil. Əsas olan aylıq ödənişlərin hansı səviyyədə olacağıdır. Hazırkı iqtisadi şərait ilə əlaqədar və əsas məqsədin aztəminatlı ailələrin mənzil probleminin həlli olduğunu nəzərə alsaq, aylıq ödənişlərin həddi 150 manatdan yuxarı olmamalıdır. Sosial kirayə evlərində isə bu daha da az olmalıdır. Hesab edirəm ki, bu şəkildə bu layihənin sosiallığını qoruyub saxlamaq olar. İlkin statistik rəqəmlərə görə, Azərbaycanda əhalinin 1/3-i evsizdir. Söhbət təsərrüfatlardan gedir. Burada, təbii ki, Bakı şəhəri ilə yanaşı, Azərbaycanın regionlarında olan aztəminatlı ailələrin mənzil təminatının yaxşılaşdırılması aktual olaraq qalır. Yəni konkret say demək olmaz. Amma ümumi əhalinin, ümumi təsərrüfatların 1/3-i kifayət qədər böyük bir rəqəmdir. Düşünürəm ki, qısa müddət ərzində bütün aztəminatlı ailələrin bu problemini həll etmək mümkün olmayacaq. Buna ən azı 10 illik bir dövr lazımdır".
Vidadi ORDAHALLI
