Ruslan Atakişiyev: "Ucuz maliyyə resursları sərmayə qoyuluşu baxımından mühüm əhəmiyyət kəsb edir"
Prezident İlham Əliyev Nazirlər Kabinetinin ilin birinci rübünün yekunlarına və qarşıda duran vəzifələrə həsr olunan iclasında sahibkarlığın inkişafı ilə bağlı bir sıra məqamlara toxunub:
"Bu il sahibkarlığın inkişafı ilə bağlı güzəştli kreditlərin verilməsi prosesi davam edir və 150 milyon manat məbləğində güzəştli kreditlər veriləcək. Eyni zamanda, qeyd etməliyəm, son illər ərzində yenə də bizim siyasətimizə uyğun olan bir proses ondan ibarətdir ki, Azərbaycanda 32 iri fermer təsərrüfatı yaradılıb. Bu fermer təsərrüfatlarının əkin sahəsi 44 min hektardır. Hazırda 24 rayonda 142 min hektarda 33 aqropark yaradılır. Bu aqroparkların yaradılmasına xərclənən vəsait 1 milyard manat dəyərindədir. Bu 33 aqropark və bundan əvvəl yaradılmış 32 iri fermer təsərrüfatı məhsuldarlığın artmasına, daxili tələbatın ödənilməsinə və ixrac potensialının güclənməsinə çox böyük təsir edəcək. Xüsusilə nəzərə alsaq ki, bu aqroparklar və təsərrüfatlar müasir texnologiyalar əsasında qurulur".
Ölkə başçısı hesab edir ki, güzəştli kreditlərin verilməsi ilə yanaşı, müvafiq qurumlar ölkəyə sərmayə cəlbində maraqlı olmalıdır: "Biz xarici sərmayənin cəlb edilməsi ilə bağlı daha da fəal iş aparmalıyıq - həm dövlət orqanları, həm də yerli icra orqanları. Yerli icra hakimiyyətləri də sərmayə cəlb etməlidirlər. Onlar həm yerli, həm xarici iş adamlarını maraqlandırmalıdırlar ki, gəlib investisiya qoysunlar. Yerlərdən təşəbbüs daha da geniş vüsət almalıdır".
Bütün bu deyilənlərin fonunda, sahibkarlara 150 milyon manat güzəştli kreditin verilməsinin əhəmiyyətini ekspertlər necə dəyərləndirir?
Sözügedən məsələ ilə bağlı fikirlərini "Bakı-Xəbər"lə bölüşən İqtisadi Resursların Öyrənilməsi Mərkəzinin direktoru Ruslan Atakişiyev indiki şəraitdə sahibkarlara güzəştli kreditlərin verilməsinə müsbət prizmadan yanaşdı: "Sahibkarların fəaliyyət göstərməsi üçün bir sıra resursların olması vacibdir. Bunlara kadr potensialı, xammal, avadanlıq və digər məsələlər daxildir. Ancaq bunların içində başlıca yerdə kapital durur. İndiki şəraitdə sahibkarların sərfəli şərtlərlə verilən kreditlərə çox ehtiyacı var. Ona görə ki, bankların verdiyi kreditlərin faiz dərəcələri yüksəkdir. Digər tərəfdən, bankların çoxu iqtisadiyyatın bir sıra sahələri üzrə kredit ayırmaqda maraqlı olmur. Məsələn, kənd təsərrüfatı sahəsinə kredit verməkdə elə də maraqlı olmurlar. Bu da fermerlərin işini çətinləşdirir. Belə olan halda, maliyyə bazarının vəsaitlərinin genişlənməsi, artırılması, maliyyə bazarına çıxış imkanlarının artırılması zərurəti ortaya çıxır. Sahibkarların ucuz maliyyə resursları əldə etməsi iqtisadiyyata sərmayə qoyuluşu baxımından mühüm əhəmiyyət kəsb edir. O baxımdan sahibkarlara güzəştli kreditlərin verilməsinə müsbət yanaşıram".
Vidadi ORDAHALLI
