Zakir Əhmədov: "Azərbaycan brendinin dünyada tanınması bizim xeyrimizədir"
"Made in Azerbaijan" brendi çərçivəsində Azərbaycanın 92 brendi Ümumdünya Əqli Mülkiyyət Təşkilatı tərəfindən qeydiyyata alınıb". Bunu "IV Caspian Energy" beynəlxalq forumunda çıxış edən Standartlaşdırma, Metrologiya və Patent üzrə Dövlət Komitəsinin sədri Ramiz Həsənov bəyan edib.
Azərbaycanın iqtisadiyyat nazirinin müavini Sahil Babayev isə bildirib ki, ölkəmizin xaricdəki səfirliklərində ilk ticarət nümayəndəliyi ölkəmizin Rusiyadakı Səfirliyində təsis edilib: "Növbəti nümayəndəliklərin Çin və Birləşmiş Ərəb Əmirliklərində açılacağı planlaşdırılır".
O da məlumdur ki, Azərbaycan dünya bazarında keyfiyyətli məhsulları ilə möhkəmlənməkdədir. Bu sırada qeyri-neft sektoruna aid olan məhsulların sayı getdikcə artır. Bu sektorun məhsullarının ixracı 10 faiz artıb ki, bu da indiki dövrdə yaxşı göstəricidir. Ancaq ixrac potensialımız böyükdür və ondan mümkün qədər çox istifadə olunmalıdır.
Prezident İlham Əliyevin sədrliyi ilə keçirilən Nazirlər Kabinetinin 2017-ci ilin birinci rübünün yekunlarına və qarşıda duran vəzifələrə həsr olunmuş iclasında dövlət başçısı qeyri-neft sektorunun istehsal etdiyi məhsulların ixracı ilə bağlı deyib ki, Azərbaycan brendi indi dünyada təbliğ edilir: "Biz bir çox sərgilərdə iştirak etmişik və yenə də iştirak etməliyik. Müxtəlif ölkələrdə ticarət evləri yaradılır, ticarət-ixrac missiyaları həyata keçirilir. Müvafiq sərəncamlar verildi, vəsait ayrıldı. Xarici media vasitələrində reklam kampaniyaları aparılmalıdır ki, biz "Made in Azerbaijan" brendini tanıtdıraq".
Görülən işlər çərçivəsində Azərbaycanın 92 brendinin Ümümdünya Əqli Mülkiyyət Təşkilatı tərəfindən qeydiyyata alınması ölkənin uğurudur.
Məsələyə münasibət bildirən ekspert Zakir Əhmədovun fikrincə, çalışmalıyıq ki, daha çox Azərbaycan brendi dünyada tanınsın: "Ona görə ki, Azərbaycanın bununla bağlı potensialı böyükdür. Bir sıra məhsullar var ki, onları dünya bazarına çıxarmaq lazımdır. İndi ölkəmiz xarici bazarlara daha çox meyvə-tərəvəz məhsulları göndərir. Xiyar, pomidor, xurma, fındıq, badam, püstə, üzüm, nar və şirələr idxalçılar tərəfindən həvəslə alınır. Nərə balığının qara və qırmızı kürüləri isə həm növbə gözləmir, həm də nadir mal kimi baha qiymətə satılır. Yaxın illərdə dünya standartlarına uyğun hazırlanan Gəncə şərabları, polietilen və tekstil malları, xalçalarımız, Naxçıvanın məşhur mineral suları, çay, sitrus meyvələri, tikinti materialları və s. dünya bazarlarına çıxarılacaq. Digər məhsullar da var ki, onların dünya bazarına çıxarılması ölkəyə böyük iqtisadi fayda gətirəcək. Bütün hallarda, Azərbaycan brendinin dünyada tanınması bizim xeyrimizədir".
Vidadi ORDAHALLI
