Vahid Əhmədov: "Artıq bu tipli pilot layihələr həyata keçirilir"
"Nazirlər Kabineti özünüməşğulluq proqramına xüsusi diqqət yetirməlidir". Bu sözləri Prezident İlham Əliyev Azərbaycan Prezidenti İlham Əliyev Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib. İ.Əliyev qeyd edib ki, bölgələrdə məşğulluğun artırılması daim diqqət mərkəzindədir.
Çünki bizdə əhali artır, bu il də, gələn illərdə də artacaq və artan əhali üçün gələcəkdə yeni iş yerləri lazım olacaq: "Məşğulluğun artırılması həmişə gündəlikdə duran məsələ olacaq. Həm dövlət, həm özəl sektorda 70 min daimi iş yeri yaradılıbdır, mövsümi işlərlə bərabər 85 min. Bu, üç ay üçün böyük rəqəmdir və bu işləri davam etdirməliyik. Eyni zamanda, özünüməşğulluq proqramı geniş vüsət almalıdır. Artıq birinci addımlar atılıb və bu, həm dövlət orqanları, yerli icra orqanları, həm də özəl qurumlar tərəfindən həyata keçirilən layihələr olmalıdır. Çünki hər bir ailənin, yəni hələ yoxsulluq şəraitində yaşayan ailənin imkanı olmalıdır ki, öz ehtiyacını özü ödəsin və biz bu imkanı yaratmalıyıq. Əlbəttə, dövlət çətin vəziyyətdə yaşayan vətəndaşlara həmişə qayğı, diqqət göstərir, ünvanlı sosial yardım proqramı icra edilir. Ancaq biz tədricən özünüməşğulluq sisteminə keçməliyik. Bu, vətəndaşlar üçün də daha əlverişlidir, daha yaxşıdır. Onların öz ailə büdcələri olacaq. Sadəcə biz onlara kömək etməliyik. Kənd yerində onlara şərait yaradılmalıdır, mal-qara, ev quşları verilməlidir. Arıçılıq, heyvandarlıq burada çox böyük rol oynaya bilər ki, onlar öz büdcələrini özləri təmin etsinlər. Amma dövlət əlbəttə ki, ilk mərhələdə onlara kömək göstərəcək".
Dövlət başçısı deyib ki, Nazirlər Kabineti özünüməşğulluq proqramına xüsusi diqqət yetirməlidir: "Yenə də deyirəm, burada bütün müvafiq qurumlar, strukturlar vahid siyasət aparmalıdırlar. Əlbəttə ki, bu işlər Əmək və Əhalinin Sosial Müdafiəsi Nazirliyinin xətti ilə aparılır, ancaq hesab edirəm ki, digər nazirliklər - İqtisadiyyat Nazirliyi, Kənd Təsərrüfatı Nazirliyi, yerli icra orqanları və sahibkarlar buna qoşulmalıdır. Mənə mütəmadi qaydada məruzə edilməlidir ki, bu istiqamətdə hansı işlər görülüb".
Özünüməşğulluq proqramının əhəmiyyətindən danışan millət vəkili Vahid Əhmədov "Bakı-Xəbər"ə açıqlamasında qeyd etdi ki, bu proqram sayəsində insanlar həm işlə təmin olunacaq, həm də əməklə məşğul olacaq: "Bir neçə ildir ki, maddi vəziyyəti yaxşı olmayan insanlara ünvanlı sosial yardım verilir. O sosial yardımlar uzun müddət idi ki ehtiyacı olanlara verilirdi və kifayət qədər insan bundan bəhrələnirdi. Ancaq indi Əmək və Əhalinin Sosial Müdafiəsi Nazirliyinin rəhbərliyi başqa bir variantdan istifadə edir. Ölkə başçısı İlham Əliyev də həmin proqrama müəyyən qədər vəsait ayırıb. Artıq bu tipli pilot layihələr həyata keçirilir. Sosial yardım alanlar məşğulluqla bağlı müəyyən pilot layihələrdə iştirak edə bilər. Yəni kimsə heyvandarlıqla məşğul olmaq istəyirsə, ona bu sahədə köməklik göstəriləcək. Bu cür pilot layihə artıq Göyçay rayonunda həyata keçirilib. Zaman-zaman ünvanlı sosial yardım aradan qalxacaq. İnsanlar artıq daimi işlə məşğul olmaq istəyir. Bu çox gözəl layihədir".
Millət vəkili onu da dilə gətirdi ki, "Strateji Yol Xəritəsi"ndə adıçəkilən layihənin vacibliyi barədə qeyd olunub. Özünüməşğulluq proqramının icrasına başlanması çoxlu sayda iş yerinin açılması deməkdir.
Günel CƏLİLOVA
