Günel Fərhadqızı: "Daxili istehsalı stimullaşdırmaq üçün ciddi dəyişikliklər edildi"
Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev deyib ki, bu ilin birinci rübünün yekunları onu göstərir ki, Azərbaycan iqtisadiyyatı çox dinamik şəkildə inkişaf edir:
"Mən bəzi rəqəmləri ictimaiyyətin diqqətinə çatdırmaq istəyirəm. Bu rəqəmlər mövcud iqtisadi vəziyyətimizi hər şeydən yaxşı əks etdirir. İqtisadiyyatımızın əsas göstəriciləri qeyri-neft sektorunun, qeyri-neft sənayesinin və kənd təsərrüfatının inkişafıdır. Bütün bu istiqamətlər üzrə yaxşı nəticələr var. İqtisadiyyatın qeyri-neft sektoru 2,4 faiz artıb, qeyri-neft sənayemizin artımı 2 faiz səviyyəsində olub, kənd təsərrüfatı 3,5 faiz artıb. Xüsusilə qeyd etmək istəyirəm ki, bitkiçilik 20 faizdən çox artıb. Bu onu göstərir ki, bizim gördüyümüz işlər, ciddi islahatlar, investisiyalar artıq öz nəticələrini verir.
Birinci rübdə bizim valyuta ehtiyatlarımız 1 milyard dollar səviyyəsində artıb. Bu gün valyuta ehtiyatlarımız 38,5 milyard dollardır. Bu böyük rəqəmdir. Biz keçən il valyuta ehtiyatlarımızı qoruya bilmişik. Baxmayaraq ki, neftin qiyməti kəskin səviyyədə aşağı düşüb, bu il nəinki qoruya bilmişik, birinci üç ayda biz əlavə 1 milyard dollar qazanmışıq. Əminəm ki, biz il ərzində valyuta ehtiyatlarımızı artıracağıq. Bax, bu çox önəmli məsələdir. Çünki hamıya aydındır ki, 2015-2016-cı illər böhran illəridir. Neftin qiymətinin 3-4 dəfə aşağı düşməsi, inşaat sektorunda keçən il yaşanan durğunluq, istər-istəməz, təbii ki, bizim iqtisadi inkişafımıza mənfi təsir göstərə bilərdi. Bəlkə də hər hansı bir başqa hökumət bunun çıxış yolunu ancaq valyuta ehtiyatlarının istifadəsində görə bilərdi. Ən asan yol da bu idi. Ancaq bax, məsuliyyətli yanaşma və uzunmüddətli inkişaf planlarımız əlbəttə ki, bizim üçün başqa seçimi diktə edir. Bu, məsuliyyətli seçim idi, bu, xalqın maraqlarını hər şeydən üstün tutan seçim idi. Biz tezliklə ciddi islahatları dəyərləndirdik, çox operativ tədbirlər gördük. İqtisadiyyatımızın restrukturizasiyası ilə bağlı çox ciddi addımlar atıldı. Biznesi, investisiyaları, ixracı stimullaşdırmaq istiqamətində müvafiq qərar və qanunlar qəbul edildi. Beləliklə, biz iqtisadi dayanıqlığımızı qoruya və valyuta ehtiyatlarımızı artıra bildik. Neftlə zəngin olan ölkələrin, demək olar ki, əksəriyyəti keçən il və bu il öz valyuta ehtiyatlarını itirirlər. Biz isə artırırıq".
Azərbaycan dünyada gedən iqtisadi böhrana baxmayaraq, valyuta ehtiyatlarını artırmağa necə nail olub?
İqtisadçı Günel Fərhadqızı qəzetimizə bildirdi ki, ölkə başçısı çıxışında bununla bağlı konkret məqamlara toxunub: "Əlavə olaraq qeyd etmək istərdim ki, dünyada baş verən iqtisadi tənəzzül Azərbaycandan da yan keçmədi. Bu da təbiidir. Çünki bizim əsas ixrac məhsulumuz olan neftin qiyməti kəskin aşağı düşdü. Ötən illər ərzində keçirilən
dövlət tədbirlərinə nəzər salsaq görərik ki, ölkə başçısı bütün çıxışlarında vəziyyətdən çıxış yolları ilə bağlı proqramlar təqdim edib. Dərhal qanunvericilik qeyri-neft sektorunun inkişaf etdirilməsinin tələblərinə uyğunlaşdırıldı. Gömrükdə ciddi sadələşdirilmələr aparıldı. Daxili istehsalı stimullaşdırmaq üçün ciddi dəyişikliklər edildi. Qeyri-neft sektorunun inkişafı üçün bir sıra lisenziyaların alınması ləğv edildi. Bütün bunlar nəticəsində idxal azaldı, ölkədən ixrac artdı. Bu da iqtisadi inkişafı şərtləndirir. Əsası qoyulan işlər bu il yenicə bəhrəsini verir. Sonrakı dövrlərdə inkişaf daha aydın özünü büruzə verəcək. Çünki bu proqram geniş strategiya üçün hesablanıb".
Məhəmmədəli QƏRİBLİ
