Əli Əlirzayev: "Bu çox yüksək nəticədir"
"Bu ilin ilk 3 ayı ərzində qeyri-neft sektorunda 2,4 faiz artım olub, qeyri-neft sənayesində isə artım 2 faiz səviyyəsindədir. Kənd təsərrüfatı 3,5 faiz, bitkiçilik 20 faizdən çox artıb". Bunu Azərbaycan Prezidenti İlham Əliyev Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında söyləyib.
Dövlət başçısı deyib ki, bu ilin birinci rübündə valyuta ehtiyatlarımız 1 milyard dollar artıb: "Bu gün valyuta ehtiyatlarımız 38,5 milyard dollar təşkil edir. Bu önəmli bir məsələdir."
Belə məlum olur ki, Azərbaycan 2015-2016-cı illərdəki iqtisadi böhranı uğurla aradan qaldırıb və inkişaf yoluna qədəm qoyub. Bütün bunlar təsadüfi deyil. Ona görə ki, 2016-cı ildə həyata keçirilən islahatlar 2017-ci ilin birinci rübündə öz müsbət nəticələrini göstərib. Belə olmasaydı, o zaman artım olmazdı, yaxud da çox aşağı səviyyədə olardı. İnvestisiya proqramları, o cümlədən infrastruktur layihələri icra olunub. Hazırda dünya iqtisadiyyatı böyük böhran içərisindədir. Buna baxmayaraq, Azərbaycan öz iqtisadi potensialını qoruya bilib. Reallıq ondan ibarətdir ki, ölkədə dinamik inkişaf var və bu bir sıra sektorlarda özünü göstərir. Bütün bunlar da aparılan islahatların və görülən işlərin nəticəsidir.
Maraqlıdır, bəs ekspertlər bu artımı necə dəyərləndirir?
Məsələyə münasibət bildirən iqtisadçı-alim Əli Əlirzayevin fikrincə, bu ilin 3 ayında bu qədər artımın olması sevindiricidir: "İlkin mərhələ üçün bu sahədə 2,4 faizlik yüksəliş şkalası çox yaxşıdır. Vaxt vardı ki, artım səviyyəsi 15 faizdən də yuxarı olurdu. O vaxt neftin bir barreli 150 dollara yaxın idi. İndi isə ilk növbədə qeyri-neft sektorunda dinamizmi formalaşdırmaq lazımdır. Artıq bunun ilk işartılarının şahidi oluruq. Ölkə başçısı qeyd etdi ki, bitkiçilik 20 faiz inkişaf edib. Bu çox yüksək nəticədir, özü də indiki şəraitdə. Çünki dünyada böhran mərhələsi davam edir. Ümumilikdə isə, kənd təsərrüfatındakı ilk üç aydakı inkişaf 3,5 faizdir. İşlər bərabərsürətli aparıldıqda sürət çox da yüksək olmaya bilər. Amma sağlam sütunlara əsaslanır, dayanıqlı iqtisadiyyat formalaşır. Bu o deməkdir ki, biz yerimizdə dayanmamışıq. Ölkə rəhbəri və onun komandası iqtisadiyyatımızın daha sağlam təməllər üzərində dayanması üçün böyük işlər görür və maneələri dəf edir. Şübhəsiz ki, bu cür iqtisadi inkişaf ölkə başçısının adı ilə bağlıdır. Yaddan çıxarmayaq ki, iqtisadi inkişafın əsas şərtlərindən biri də ölkədəki sabitlikdir. Bu da ölkə rəhbərinin düşünülmüş, uzaqgörən və balanslaşdırılmış siyasətindən qaynaqlanır".
Vidadi ORDAHALLI
