Rəsul Cahangirli: "Aparılan məqsədyönlü iqtisadi siyasətə uyğun olaraq neft amilinin rolu azaldılıb"
"2017-ci il yaxşı başlayır, yaxşı nəticələr var. Çalışmalıyıq ki, il ərzində bu dinamikanı saxlayaq və 2017-ci ili də uğurla başa vuraq". Prezident İlham Əliyev bu fikirləri Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
Ölkə başçısının fikrincə, önəmli məsələlərdən biri, təbii ki, makroiqtisadi sabitlikdir: "Bu makroiqtisadi sabitliyi möhkəmləndirməliyik. Süni qiymət artımına yol verilməməlidir. İstehlak qiymətlərinə daim diqqət göstərilməlidir, bu, nəzarət altında olmalıdır. Hesab edirəm ki, bütövlükdə makroiqtisadi sabitlik baxımından 2017-ci il əvvəlki illərlə müqayisədə daha uğurlu olacaq. Bunu deməyə kifayət qədər əsaslar var. Bu istiqamətdə düşünülmüş və çox çevik siyasət aparılmalıdır. 2017-ci il Azərbaycan üçün uğurlu il olacaq".
Ölkə başçısı onu da vurğulayıb ki, dövlət büdcəsinin icrası da uğurla gedir: "Həm gömrük, həm vergi orqanları rüblük planı artıqlaması ilə yerinə yetiriblər. Bu yaxşı haldır. Eyni zamanda, büdcə xərcləri də 100 faiz icra edilməlidir. Çünki əvvəlki illərdə bəzi hallarda investisiya xərclərində nəzərdə tutulan vəsaitdən tam istifadə edilmirdi. Bu il isə həm qəbul edilmiş pul proqramı, eyni zamanda, xərclərlə gəlirlər arasındakı tarazlıq tam təmin edilməlidir. Builki investisiya proqramı kifayət qədər təsirli olmalıdır. Bu gün ölkə üçün ən lazımlı layihələrə kifayət qədər vəsait ayrılır və birinci rübdə işlər yaxşı gedir. Gərək investisiya proqramı tam şəkildə icra edilsin".
Bütövlükdə, 2017-ci ilin uğurlu olacağını şərtləndirəcək faktorlar necə şərh olunur?
Məsələyə münasibət bildirən ekspert Rəsul Cahangirlinin sözlərinə görə, deyilənlər reallığı əks etdirir: "Məsələ ondadır ki, aparılan məqsədyönlü iqtisadi siyasətə uyğun olaraq neft amilinin rolu azaldılıb. Neçə illərdir Dövlət Neft Fondundan büdcəyə edilən transferlərin həcmi azalır. Həmçinin, builki büdcədə neftin 1 barrelinin 40 dollardan götürülməsi buna misal göstərilə bilər. 2015-ci ildən başlanan struktur və digər islahatlar yeni reallıqların ortaya çıxmasına şərait yaradıb. Nəzərə almaq lazımdır ki, 2016-cı ildə islahatların miqyası bir az da dərinləşdirildi. Bütün bunlarla yanaşı, qeyri-neft sektorunun inkişaf etdirilməsi başlıca məqsəddir. Görülən işlərin nəticəsidir ki, bu ilin ilk 3 ayı ərzində qeyri-neft sektorunda 2,4 faiz artım qeydə alınıb. Qeyri-neft sənayesində isə artımın səviyyəsi 2 faiz təşkil edir. Artıq əminliklə demək mümkündür ki, Azərbaycanı bu il ciddi iqtisadi risqlər gözləmir. Bütün bunlardan çıxış edərək hesab edirəm ki, bu il bütün sahələrdə uğurlu il olacaq".
Vidadi ORDAHALLI
