Vüqar Bayramov: "Bu da həmin valyutanın ölkədə qalmasına gətirib çıxarır ki, nəticədə yerli istehsal genişlənməyə başlayır"
Bu ilin üç ayında Azərbaycanın ticarət dövriyyəsi 15 faiz artıb. Bu da çox yaxşı göstəricidir. İxrac təxminən 50 faiz artıb. Sevindirici hal ondan ibarətdir ki, qeyri-neft ixracımız təqribən 10 faiz ətrafında artıb, idxal isə 17 faiz azalıb. Kənd təsərrüfatı 3,5 faiz, bitkiçilik 20 faizdən çox artıb. Bu barədə Prezident İlham Əliyev Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında məlumat verib.
Dövlət başçısı vurğulayıb ki, idxalın azalması, ixracın kəskin artması bizim iqtisadi sabitliyimizi təmin edir. Bu göstəricilər bizim iqtisadi vəziyyətimizi real əks etdirir: "Biz idxaldan asılılığımızı azaltmaq üçün yerli istehsalı stimullaşdırdıq, biznes qurumlarına çox gözəl şərait yaratdıq, xüsusilə kənd təsərrüfatı sahəsinə texnikanın alınmasına və digər tədbirlərə dövlət investisiyaları qoyuldu".
İlin birinci rübündə 85 min yeni iş yerinin yaradıldığını qeyd edən Prezident onlardan 70 mininin daimi olduğunu diqqətə çatdırıb. İlham Əliyev onu da əlavə edib ki, iş yerlərinin yaradılması təkcə dövlət sektorunda yox, özəl sektorda da davam edir.
Ümumən ekspertlər bu inkişafı necə dəyərləndirir? Hansı məhsulların idxalı azalıb? Məsələyə münasibət bildirən iqtisadçı-ekspert Vüqar Bayramovun fikrincə, əsasən aqrar məhsulların idxalı azalıb: "Burada əsasən söhbət aqrar məhsullara olan tələbin azalmasından gedir. Məsələ ondadır ki, bir sıra kənd təsərrüfatı məhsullarının ölkə daxilində istehsalının artması həmin məhsulların idxalını azaldıb. Eyni zamanda, qida sənayesində idxal məhsullarının azalması müşahidə olunur. Digər tərəfdən, ölkə sakinlərinin qənaət tədbirləri görməsi də buna öz təsirini göstərib. Başqa bir səbəb isə idxalın məhdudlaşdırılması ilə bağlıdır. Nəzərə almaq lazımdır ki, bu kimi tədbirlərin görülməsi müsbət haldır. Ona görə ki, bu, ölkədən kənara çıxan valyutanın qarşısını alır. Bu da həmin valyutanın ölkədə qalmasına gətirib çıxarır ki, nəticədə yerli istehsal genişlənməyə başlayır. O baxımdan bu istiqamətdə görülən işləri müsbət dəyərləndirirəm".
Vidadi ORDAHALLI
