Əkrəm Həsənov: "Bankların sağlamlaşdırılması, onlar üzərində səmərəli nəzarətin tətbiq olunması üçün Maliyyə Bazarlarına Nəzarət Palatasının kifayət qədər səlahiyyəti olmalıdır"
Milli Məclisin sədri Oqtay Əsədov parlamentin plenar iclasında bildirib ki, Azərbaycanda zərərlə işləyən banklar mütləq sağlamlaşdırılmalıdır: "Bu gün bəzi qəbul olunan qanunların məqsədi bankların sağlamlaşdırılmasıdır. Bankların doğrudan da buna ehtiyacı var. Gündə 5 milyon manat zərər edən banklar var. Özü də zərər günbəgün artır: 5 milyon olacaq 10 milyon, 10 milyon olacaq 40-50 milyon manat. Buna görə bu bankları sağlamlaşdırmaq lazımdır. Ona görə "körpü bank" və bu qanunlar lazımdır. Maliyyə Bazarlarına Nəzarət Palatasına səlahiyyətlər vermək lazımdır ki, bankların piramida kimi müflisləşməsinin qarşısı alınsın".
Maraqlıdır, bankların sağlamlaşdırılması üçün Maliyyə Bazarlarına Nəzarət Palatasına hansı səlahiyyət vermək lazımdır?
Bank sahəsi üzrə mütəxəssis Əkrəm Həsənov "Bakı-Xəbər"ə açıqlamasında qeyd etdi ki, bank sistemində vəziyyət gündə dəyişir. Bankların sağlamlaşdırılması, onlar üzərində səmərəli nəzarətin tətbiq olunması üçün Maliyyə Bazarlarına Nəzarət Palatasının kifayət qədər səlahiyyəti olmalıdır: "Sadəcə, burada əsas iki məqam var. Həm bankların səhmdarları, həm də kreditorları tərəfindən Palatanın qəbul etdiyi qərarları mübahisələndirmək mümkün olsun".
Həmsöhbətimizin sözlərinə görə, qanunvericiliyə ediləcək dəyişikliyə əsasən, Palatanın qəbul etdiyi qərarların hətta məhkəmə tərəfindən ləğv olunmasına icazə verilməyəcək. Nəzərə almaq lazımdır ki, dövlət başçısının qəbul etdiyi sərəncam və fərmanların məhkəmə yolu ilə ləğv edilmə mexanizmi var.
Ekspert bildirdi ki, bankların kreditorları Palatanın qərarlarını mübahisələndirə bilər. Qanunvericiliyə əsasən, istənilən bankın əmanətçisi əmanətini tələb edə bilər. 5 iş günü ərzində o əmanət qaytarılmalıdır. Yaxud hansısa şirkətin bankda cari hesabı var. Bank həmin pulu 1 iş günü ərzində qaytarmalıdır: "Bank bunları etməsə, deməli, müflis olub. Müflis olan bankın əmanətçilərinə Əmanətlərin Sığortalanması Fondu tərəfindən vəsait geri qaytarılmalıdır.
Bu proses 3 aydan 6 ayadək həll olunmalıdır. İndi edilən dəyişiklik əmanətçilərin və digər müştərilərin hüquq və azadlıqlarını məhdudlaşdırmamalıdır".
Müsahibimiz onu da dilə gətirdi ki, "Normativ-hüquqi aktlar haqqında" Qanuna əsasən, istənilən dövlət orqanına həddindən artıq səlahiyyət verilə bilməz: "Ona görə ki, həmin qurum öz səlahiyyətindən sui-istifadə etməsin".
Günel CƏLİLOVA
