Aydın Hüseynov: "Dövriyyədəki vəsait nə qədər çox sürətlə dövr edərsə..."
"İnsanları narahat edən yüksək kredit faizləri ilə bağlı Azərbaycan hökumətinin ciddi çalışmaları var". Xəbər verildiyi kimi, bunu baş nazirin müavini, Yeni Azərbaycan Partiyasının sədr müavini, icra katibi Əli Əhmədov bildirib.
O qeyd edib ki, Azərbaycan Prezidenti İlham Əliyevin hökumətin iclasında bildirdiyi kimi, bank sektorunda olan yarıtmaz hallar ölkə iqtisadiyyatına böyük zərbə vurub: "Bu, reallıqdır. Prezidentin təşəbbüsü ilə hazırda bank sektorunda sağlamlaşdırma istiqamətində ciddi addımlar atılır. Təbii ki, bunların arasında kreditlərlə bağlı problemlər də həllini tapmalıdır. Banklar iqtisadiyyatın inkişafının damar sistemidir. Bank fəaliyyətini sağlamlaşdırmadan iqtisadiyyatın inkişafına nail olmaq mümkün deyil. Azfaizli kreditlər olmadan sahibkarlığın inkişafına da dəstək vermək mümkün deyil. Bütün bunlar hamısı hökuməti ciddi şəkildə düşündürür. Obyektiv çətinliklər var, bununla bağlı ən düzgün qiyməti cənab Prezident verib. Bu istiqamətdə çox ciddi addımlar atılır və güman edirəm ki, yaxın zamanlarda maliyyə-kredit sahəsində ciddi sağlamlaşdırmanı həyata keçirə biləcəyik".
Bütün bu deyilənlərin fonunda, yüksək kredit faizləri ilə bağlı ekspertlərin hökumətdən gözləntiləri nədən ibarətdir və bu istiqamətdə proqnozları necədir? Məsələyə münasibət bildirən millət vəkili Aydın Hüseynovun sözlərinə görə, son vaxtlar bankların sağlamlaşdırılması istiqamətində ciddi addımlar atılır: "Bu sahədə ciddi islahatlar həyata keçirilir. Eyni zamanda, qanunvericilik bazasında qanunlara çox mühüm əlavələr olunur. Bu isə son nəticədə o deməkdir ki, bankların sağlamlaşdırılması prosesi sürətlənəcək. Görülən işlər çərçivəsində banklara inam artdıqca, kreditləşmə mexanizmini daha yüksək tərzdə həyata keçirməyi bacardıqca, faizlər aşağı düşəcək. Məsələ ondadır ki, faizlərin yuxarı olması bankların birbaşa verdikləri kreditlərdən tez bir zamanda gəlir əldə etməsi ilə bağlıdır. Eyni zamanda, bu bəzən özünə inamın olmaması səbəbindən doğan məsələdir. Banklarda aparılan sağlamlaşdırma prosesi və onların beynəlxalq standartlara uyğunlaşdırılması ona gətirib çıxaracaq ki, kredit faizləri aşağı düşəcək. Aşağı bank faizləri kreditlərin geri qayıtması üçün əsas olur. Bununla yanaşı, dövriyyədəki vəsait nə qədər çox sürətlə dövr edərsə, gəlirlər də bir o qədər çox əldə olunacaq".
Vidadi ORDAHALLI
