Natiq Cəfərli: "Bankların müştəridən dollar almamasının səbəbi onların xarici valyutadan imtina etməsi ilə bağlı deyil, sadəcə, banklarda manat problemi var"
Dollar sürətlə ucuzlaşdığından, bir sıra bankların dollar almaqdan imtina etdikləri bildirilir. Müştərilər dollar satmaq istəsələr də, banklar almaqdan imtina edir.
Bankların dollar alışından imtina etməsi səbəbi dolların sürətlə ucuzlaşması və manat qıtlığıdır. Dolların məzənnəsi sürətlə düşdüyündən, banklar ziyan etməmək üçün alış qiymətini satış qiymətindən xeyli aşağı təyin etməyə çalışır. Həmçinin dollara ehtiyacı olan sahibkarlar da daha ucuz alış etmək üçün gözləmə mövqeyindədir.
Məsələ ilə bağlı ekspertə müraciət etdik. İqtisadçı Natiq Cəfərli "Bakı-Xəbər"ə açıqlamasında qeyd etdi ki, bankların müştəridən dollar almamasının səbəbi onların xarici valyutadan imtina etməsi ilə bağlı deyil. Sadəcə, banklarda manat problemi var: "Mərkəzi Bank manat likvidliyini xeyli dərəcədə aşağı salıb. Manat dövriyyəsi azalıb. Banklar əllərində olan sərbəst manat kütləsini həftəlik hərraclarda yığır. Danılmaz faktdır ki, hazırda banklarda manat çatışmazlığı var. Bu, iqtisadi aktivliyə təsir edən amildir".
Həmsöhbətimiz bildirdi ki, bankların dollar almaq marağı var. Sadəcə, banklar manat çatışmazlığı ilə qarşı-qarşıya qalıb. Bu, bütün banklara aid deyil: "Dollar alan banklar da var. Hansı banklarda manat likvidliyi yoxdursa, onlar dollar ala bilmir. Mərkəzi Bankın bu addımı milli valyutaya olan basqıları azaldır və manatın məzənnəsinə təsir göstərir. Ancaq bu, təbii proses deyil. Çünki nəzərə almaq lazımdır ki, son günlər dünyada dolların indeksi artır, türk lirəsi ucuzlaşır, rubl dəyərini itirir. Danılmaz faktdır ki, hazırda dünyada dolların bahalaşması müşahidə olunur. Azərbaycan iqtisadiyyatında xarici valyutanı yüksəldə biləcək hər hansı bir dəyişiklik yoxdursa, bu prosesin təbii olmadığını anlamaq elə də çətin deyil. Bir müddət sonra Mərkəzi Bank manat kütləsini bu qədər sıxmaqla iqtisadi aktivliyin tamamilə zəiflədiyini görəcək. Ölkə iqtisadiyyatında manat dövriyyəsi azalırsa, iqtisadiyyat taqətdən düşür. Hazırda Azərbaycan iqtisadiyyatı halsızlaşma dövrünü yaşayır".
Günel CƏLİLOVA
