Zakir Əhmədov: "Bu, iki ölkə arasında iqtisadi əlaqələrin genişlənməsinə və ticarət dövriyyəsinin artmasına gətirib çıxaracaq"
Nursultan Nazarbayev Aktau şəhərində "Azərbaycan İnvestisiya Şirkəti" ASC və "Azersun Holding"in birgə layihəsi olan "Azərsun İstehsal və Logistika Mərkəzi" ilə tanış olub.
Azərbaycanın iqtisadiyyat naziri Şahin Mustafayev qeyd edib ki, Azərbaycan və Qazaxıstan arasında siyasi və iqtisadi əlaqələrin yüksək səviyyədə olması, qarşılıqlı hörmət və tərəfdaşlıq prinsiplərinə əsaslanması iki ölkə arasında bir sıra iqtisadi layihələrin uğurla reallaşdırılmasına şərait yaradır.
Nazir bildirib ki, belə layihələrdən biri də "Aktau Dəniz Limanı" Xüsusi İqtisadi Zonasında yerləşən "Azərsun İstehsal və Logistika Mərkəzi"dir. O, Logistika Mərkəzi barədə ətraflı məlumat verib. Həmçinin, mərkəzin müxtəlif avadanlıqlarla təmin edildiyini bildirib: "Azərsun İstehsal və Logistika Mərkəzi"nin fəaliyyətinin səmərəliliyinin yüksəldilməsi üçün xüsusi gömrük rejiminin tətbiq olunması məqsədəuyğundur".
N.Nazarbayev Azərbaycan və Qazaxıstan dövlət başçılarının tapşırığının qısa müddətdə və keyfiyyətli icrasını yüksək qiymətləndirib, xüsusi gömrük rejiminin tətbiqi ilə bağlı Qazaxıstanın aidiyyəti orqanlarına müvafiq göstəriş verib.
Qeyd edək ki, 25 %-i dövlətə məxsus olan "Azərsun İstehsal və Logistika Mərkəzi" Azərbaycanın xarici ölkələrdə ilk logistika mərkəzidir. Mərkəz Azərbaycanda istehsal olunan sənaye, kənd təsərrüfatı və ərzaq məhsullarının Qazaxıstan və digər Mərkəzi Asiya ölkələrinə, həmçinin, Qazaxıstan mallarının Azərbaycana ixracı üçün şərait yaradır.
Belə bir logistika mərkəzi üçün xüsusi gömrük rejiminin tətbiqini ekspertlər necə dəyərləndirir? Məsələyə münasibət bildirən ekspert Zakir Əhmədovun fikrincə, xüsusi gömrük rejiminin tətbiqi "Azərsun İstehsal və Logistika Mərkəzi"nin Qazaxıstanda fəaliyyətini daha da genişləndirməsinə gətirib çıxara bilər: "Belə bir qərarın verilməsi mühüm hadisədir. Çünki Qazaxıstan böyük dövlət olmaqla yanaşı, həm də bazarı da böyükdür. Xüsusi gömrük güzəştlərinin olması ölkə bazarına daha çox məhsul çıxarılmasına imkan verəcək. Eyni zamanda, məhsulların rəqabət qabiliyyətini artıracaq. Bu da, nəticə etibarilə, Orta Asiyanın digər ölkələrinə Azərbaycan istehsalı olan məhsulların çıxarılmasına yol açacaq. Ümumən logistika mərkəzləri iqtisadi-ticarət əlaqələrinin genişlənməsində özünəməxsus rola malikdir. Sevindirici haldır ki, Azərbaycanın xarici ölkələrdə ilk belə mərkəzi fəaliyyətə başlayıb. Hesab edirəm ki, bu, iki ölkə arasında iqtisadi əlaqələrin genişlənməsinə və ticarət dövriyyəsinin artmasına gətirib çıxaracaq".
Vidadi ORDAHALLI
