Rəsul Cahangirli: "Aparılan islahatlar, iqtisadiyyatda qeyri-neft sektorunun çəkisinin artmağa doğru getməsi manata inamı artırır"
"Manatın bügünkü məzənnəsi stabildir, milli valyutamız tarazlığını tapıb. Bu vəziyyət iqtisadiyyata da müsbət təsir edir". Bunu mətbuata açıqlamasında "AGBank" ASC-nin İdarə Heyətinin sədri Əfqan Cəlilov deyib. Onun sözlərinə görə, artıq manatın məzənnəsində volatillik gözləməyə dəyməz: "O dövr arxada qaldı. Manatın məzənnəsi tarazlığını taparaq iqtisadiyyata müsbət təsir edir. İstənilən halda, güclü manat güclü iqtisadiyyatın göstəricisidir".
Bankirin proqnozuna əsasən, manat möhkəmlənməkdə davam edəcək. "Manatın güclənməsi iqtisadiyyat, o cümlədən banklar üçün lazımdır. Sirr deyil ki, bankların aktivlərində və öhdəliklərində dollarlaşma kifayət qədərdir. Manatın güclənməsi öhdəliklərin vaxtında yerinə yetirilməsinə kömək edəcək. Bununla yanaşı, banklar üçün xarici öhdəliklərin yerinə yetirilməsi çox çətindir".
Ə.Cəlilov onu da əlavə edib ki, bu gün manatın ucuzlaşması üçün heç bir əsas yoxdur: "Olsa belə, çox cüzi olacaq. Artıq manatın məzənnəsi müəyyən dəhliz daxilində hərəkət edir".
Maraqlıdır, bəs ekspertlərin manatla bağlı gözləntiləri nədən ibarətdir? Məsələyə münasibət bildirən ekspert Rəsul Cahangirlinin sözlərinə görə, deyilənlər reallığı əks etdirir. O bunu bir sıra arqumentlərlə əsaslandırdı: "Məsələ ondadır ki, artıq manatın kəskin ucuzlaşması tendensiyası arxada qaldı. Ən azından, yaxın perspektivdə belə bir risq yoxdur. Artıq makroiqtisadi vəziyyət oturuşmağa doğru gedir. Son dövrlər müşahidə olunan proseslər bu qənaətə gəlməyə əsas verir. Aparılan islahatlar, iqtisadiyyatda qeyri-neft sektorunun çəkisinin artmağa doğru getməsi manata inamı artırır. Eyni zamanda, bu, manatın dollara görə məzənnəsinin möhkəmlənməsində özünü göstərməyə başlayıb. Bütün bunlara əsaslanaraq hesab edirəm ki, manatın möhkəmlənməsi davam edəcək. Bu da ölkədəki iqtisadi inkişafa müsbət təsir göstərəcək".
Vidadi ORDAHALLI
