Xəyal Məmmədxanlı: "Fərdi həyət evlərinin sığorta olunmamasının səbəbi əksəriyyətinin sənədsiz olmasıdır"
Son zamanlar paytaxt Bakı və bölgələrdə fərdi həyət evlərində yanğın hadisələri ilə bağlı xoşagəlməz xəbərlər yayılır. Hadisə nəticəsində mənzil yanaraq kül olur, əksər hallarda xoşbəxtlikdən mənzil sahibinə heç nə olmur. Ancaq mənzil yanaraq külə döndüyü üçün, şəxs soyuq qış günlərində evsiz qalır.
Belə bir vəziyyətdə fərdi həyət evlərinin icbari sığortası gündəmə gəlir.
Açıqlanan statistik rəqəmlərə əsasən, bu ilin yanvar-oktyabr ayları üzrə daşınmaz əmlakın icbari sığortası üzrə yığımlar 5,6 % azalaraq 21 milyon 653 min 515 manat olub. Bu isə ötən ilin eyni dövrü ilə müqayisədə 1,2 milyon manat azalma deməkdir. Sığortaçılar bunu yaşayış evlərinin icbari sığortasına nəzarətin olmaması ilə əlaqələndirir.
"Azərsığorta" şirkətinin idarə heyətinin sədr müavini Aftandil Hacıyev fins.az-a bildirib ki, evlərin icbari sığortası ilə bağlı vəziyyət ürəkaçan deyil. Belə ki, ölkə başçısının fərmanına əsasən, qeyri-yaşayış obyektlərinin sığortasına nəzarət Fövqəladə Hallar Nazirliyi tərəfindən həyata keçirilir: "Ona görə də sahibkarlıq subyektlərinin sığortası ilə bağlı ciddi problem yoxdur. Fərdi yaşayış evlərinin sığortasına isə icra hakimiyyəti orqanları nəzarət etməlidir. Amma yerli icra orqanları daşınmaz əmlakın icbari sığortası ilə bağlı, demək olar ki, işi lazımı səviyyədə qurmayıb".
Sığorta sahəsi üzrə ekspert Xəyal Məmmədxanlı "Bakı-Xəbər"ə açıqlamasında qeyd etdi ki, qanunvericiliyə görə, daşınmaz əmlakın sığortası icbaridir. Lakin heç kim qanuna, demək olar ki, riayət etmir: "İcbari sığorta haqqında" Qanuna görə, həm fiziki, həm hüquqi şəxslərə aid daşınmaz əmlak sığortalanmalıdır. Bura bina, həyət evləri və iaşə obyektləri aiddir. Dükanların sığorta sahəsinə ciddi nəzarət olduğu üçün onlar məcburi qaydada obyekti sığortalayır. Həyət evlərinin sığortası məsələsi isə tam olaraq unudulub. Fərdi həyət evləri sahiblərindən sığorta tələb olunmur. Demək olar ki, daşınmaz əmlakın 95 faizi sığorta olunmayıb".
Həmsöhbətimiz onu da diqqətə çatdırdı ki, Bakı və Abşeronda 600 minə yaxın sənədsiz tikili var: "600 min sənədsiz tikili o deməkdir ki, sığorta şirkətləri həmin mənzilləri sığorta etdirmək istəsə belə, sığorta edə bilmir. Sığorta üçün önəmli sənəd evin mülkiyyət hüququnu təsdiq edən çıxarışdır".
X.Məmmədxanlı təklif edir ki, daşınmaz əmlakın sığorta məsələsinə nəzarət mexanizmi bələdiyyəyə həvalə olunsun: "Əslində, bu işlə mənzil-istismar sahələri məşğul olmalı idi. Ancaq onların fəaliyyəti göz qabağında olduğu üçün, bu iş bələdiyyələrə tapşırıla bilər".
Günel CƏLİLOVA
