Zakir Əhmədov: "Bu o deməkdir ki, dövlət büdcəsi əvvəlki kimi olmayacaq"
Azərbaycanda makroiqtisadi sabitliyin təmin olunmasını və yeni iqtisadi artıma keçidi nəzərdə tutan tədbirlər planı üzərində işlənir.
Bunu Milli Məclisin İqtisadi siyasət, sənaye və sahibkarlıq, Təbii ehtiyatlar, energetika və ekologiya, Müdafiə, təhlükəsizlik və korrupsiya ilə mübarizə, Aqrar siyasət, İctimai birliklər və dini qurumlar komitələrinin birgə iclasında 2017-ci il dövlət büdcəsinin layihəsinin müzakirəsi zamanı Mərkəzi Bankın İdarə Heyətinin sədri Elman Rüstəmov deyib: "Bilirsiniz ki, ölkədə Maliyyə Sabitliyi Şurası yaradılıb. Bu Şurada olduqca ciddi iş, müzakirələr gedir. Şurada gedən müzakirələr makroiqtisadi sabitliyin təmin olunması, struktur və sosial islahat məsələlərini də əhatə edir".
Baş bankir bildirib ki, neftin qiymətinin bu intervalda 10 dollar qalxması əlavə 1,7 mlrd. dollar gəlir, yaxud 10 dollar düşməsi 1,7 mlrd. dollar itki deməkdir: "Azərbaycan hökumətinin itkiləri qarşılamaq üçün kifayət qədər ehtiyatları və maliyyə resursları var ki, buna diqqət vermədən bütövlükdə öz siyasətini formalaşdırsın. Təbii ki, gəlirlərin artması bizim üçün çox önəmlidir. Neftin qiyməti 30-40 dollar artsa, daha yaxşı olar. Hətta yüksək neft qiymətləri olsa belə, artıq postneft erası, yeni iqtisadi modelə keçid əsas məqsəddir. Yəni qiymətlər yüksək olsa da, bundan öncəki 10 ilin iqtisadi modelinə qayıdış olmamalıdır. Çünki dünyada yeni çağırışlar var və biz bunu nəzərə almalıyıq".
Maraqlıdır, yeni iqtisadi modelin mahiyyəti nədir? Bunu əvvəlkindən fərqləndirən cəhətlər hansı ola bilər? Məsələyə münasibət bildirən ekspert Zakir Əhmədovun fikrincə, görünür, yeni modeldə əldə olunan gəlirlərin istehsal və emal sahələrinin yaradılmasına yönəldilməsi nəzərdə tutulub: "Burada bir sıra məqamlara yenidən baxıla bilər. Məsələ ondadır ki, əvvəl neftdən əldə olunan gəlirlərin həcmi ilbəil artdıqca, bu özünü büdcə artımında da göstərirdi. Yəni hər il büdcənin həcmi artırılırdı. Hesab edirəm ki, bundan sonra neft kəskin bahalaşsa belə, bu amil nəzərə alınacaq. Bu o deməkdir ki, dövlət büdcəsi əvvəlki kimi olmayacaq. Digər tərəfdən, 2004-2014-cü illərdə neft gəlirləri əsasən ölkədə sosial və böyük infrastruktur layihələrinin reallaşdırılmasına yönəldildi. Bunun nətcəsində həqiqətən də xeyli işlər görüldü. Çünki infrastruktur olmadan sahibkarlığın inkişafından, sərmayə qoyuluşundan danışmaq çətindir. O baxımdan çox güman ki, bu dəfə əldə olunan gəlirlər əsasən qeyri-neft sektorunun inkişafına yönəldiləcək. Əsasən də emal, istehsal və xidmət sahələrinin inkişafına diqqətin artırılacağı gözlənir. Bir sözlə, əldə olunan gəlirlərdən maksimum səmərəli istifadə ediləcək. Ehtimal ki, baş bankir bunları nəzərdə tutub".
Vidadi ORDAHALLI
