Ruslan Atakişiyev: "Sahibkarlıq subyektlərinin sayı artdıqca, vergi ödəyicilərinin sayı artmış olar"
Yanvarın 1-dən etibarən Azərbaycanda ƏDV-nin differensiallaşmasına başlanacaq. Bunu jurnalistlərə açıqlamasında vergilər nazirinin müavini Sahib Ələkbərov deyib.
S.Ələkbərovun sözlərinə görə, bu məsələ üzrə bəzi dövlət qurumları ilə müəyyən fikir ayrılıqları mövcuddur: "Bu, layihədir. Amma hələlik buna qarşı müqavimət var. Əgər parlament sənədi qəbul edərsə, yanvarın 1-dən etibarən layihə bu formada qəbul olunacaq".
Nazir müavini onu da deyib ki, bu il olduğu kimi, gələn il də nazirlik üçün ağır il olacaq.
Ümumiyyətlə, differensiallaşma iqtisadiyyatın optimallaşmasına aparır. Yəni ən əlverişli nöqtədir. Ona görə də ölkədə ƏDV-yə differensial yanaşma mümkün və qanunauyğun hesab olunur. Çünki böhran vəziyyətində iqtisadiyyatda ilk növbədə differensiallaşma həyata keçirilir. Bu, bir sıra inkişaf etmiş dövlətlərin təcrübəsində də belədir. İqtisadiyyatın makroiqtisadi tarazlığının qorunması çərçivəsində buna getmək olar. ƏDV-nin differensiallaşdırılması sahibkarlara və istehlakçılara faydalı olacaq.
İqtisadi Resursların Öyrənilməsi Mərkəzinin sədri Ruslan Atakişiyev hesab edir ki, ƏDV-nin differensiallaşdırılması məqsədəuyğundur: "Bu gün Azərbaycanda ticarət və iaşə sferasında dövriyyəsi 200 min manatdan yuxarı olduğu halda, həmin müəssisələrə ƏDV-ni seçmə, ya da sadələşdirilmiş vergidə qalma imkanları verilib. Yaxşı olardı ki, ƏDV-ni seçdiyi halda onlara differensial ƏDV faizi tətbiq edilsin. Bu zaman müəssisə böyüməyə doğru meylli olacaq. Bunu digər sahələrdə də həyata keçirmək mümkündür. Azərbaycanda elə sahələr var ki, onun inkişaf etdirilməsi məqsədəuyğundur. Bu baxımdan onlara da differensial ƏDV təqdim etmək olar. ƏDV-nin differensiallaşdırılması stimullaşdırıcı xarakter daşıyır. Müəssisə daha çox böyüməyə meylli olur. Gəlirlər artdıqca, ƏDV-nin artmasına baxmayaraq, orada qalan vəsait də çox olur. İkincisi, müəssisələrə yanaşma arasında fərq qoyulmuş olur. Differensial ƏDV ilə kiçik sahibkarlığın inkişafına imkan yaranır. Eyni zamanda sahibkarlıq subyektlərinin sayının artımına gətirib çıxarır. Sahibkarlıq subyektlərinin sayı artdıqca, vergi ödəyicilərinin sayı artmış olar".
Vidadi ORDAHALLI
