Azərbaycan OPEC-in neftin qiymətinin artmasına yönələn qərarına münasibət bildirdi
Azərbaycan Energetika Nazirliyi Neft İxrac edən Ölkələr Təşkilatının (OPEC) qərarına münasibət açıqlayıb. Nazirlikdən Trend-ə bildirilib ki, Azərbaycan dünya bazarında neftin qiymətinin sabitləşməsi üçün qəbul edilən istənilən qərarı dəstəkləyir.
Energetika naziri Natiq Əliyev noyabrın 30-da Vyanada OPEC Nazirlər Şurasının 171-ci iclasında neft hasilatının azaldılması ilə bağlı əldə edilən razılığı neft bazarında tarazlığın təmin edilməsi istiqamətində atılan mühüm addım kimi qiymətləndirib. Bununla yanaşı, energetika naziri hesab edir ki, neftin qiymətində sabitliyə və yüksəlişə yalnız OPEC ölkələrinin sutkalıq hasilatı 1,2 mln. barel azaltmasını nəzərdə tutan qərar uzunmüddətli olacağı təqdirdə nail olmaq mümkündür.
Nazirlikdən bildirilib: "Azərbaycanın mövqeyinə gəldikdə isə hamıya məlumdur ki, ölkə Prezidenti səviyyəsində Azərbaycan öz neft hasilatını və ixracını artırmayacağını birtərəfli qaydada bəyan edib. Bir daha vurğalayırıq ki, Azərbaycan neft haslatının artırılması ilə bağlı hər hansı bir tədbir görməyi planlaşdırmır".
OPEC-in dekabrın 9-da kartelə üzv olmayan ölkələrlə nəzərdə tutduğu görüşlə bağlı N.Əliyev bildirib ki, toplantıya dəvət olacağı və iştirakımızın zəruri hesab ediləcəyi təqdirdə Azərbaycan tədbirə qatılacaq: "Hesab edirəm ki, qeyri-OPEC ölkələri üçün hasilatı hansı həcmdə azaltmaqla bağlı məsələlər bu toplantıdakı müzakirə əsasında müəyyənləşəcək. Azərbaycan irəli sürüləcək təklifi qəbul etməyə və beləliklə, neftin qiymətinin artması prosesinə öz töhfəsini verməyə hazırdır".
Energetika Nazirliyinin yaydığı məlumatda isə deyilir ki, Natiq Əliyev OPEK-in quruma üzv olmayan ölkələrlə dekabrın 9-na təyin olunan görüşündə iştirak edə bilər. N.Əliyev görüşdə müvafiq dəvətin alınacağı və bu iclasda iştirakın məqsədəuyğunluğu barədə qərar qəbul olunacağı təqdirdə iştirak edəcək: “Hesab edirik ki, bu iclasda OPEK-ə üzv olmayan ölkələrin neft hasilatının nə qədər azaltması barədə qərar qəbul olunacaq. Azərbaycan irəli sürülən təklifləri qəbul etməyə və neft qiymətlərinin qalxmasına təkan verməyə hazırdır.”
OPEK-in daha öncə noyabrın 28-də Vyanada nəzərdə tutulan iclası Səudiyyə Ərəbistanının iclasda iştirak etməkdən imtina etməsi səbəbindən təxirə düşmüşdü. Həmin iclasda Azərbaycanın energetika naziri N.Əliyev də iştirak etməli idi.
Qeyd edək ki, ötən gün baş tutan iclasda OPEK İndoneziyanın təşkilatda üzvlüyünü dayandıraraq onun neft hasilatı üzrə kvotasını kartelin digər üzv ölkələr arasında bölmək barədə qərar qəbul edib.
İndoneziyanın energetika naziri OPEK-də görüşdən öncə bəyan edib ki, ölkəsi neft hasilatının azaldılması ilə bağlı mövqeyini hələ müəyyənləşdirməyib.
