Ötən gün Yunanıstan hökuməti ilə SOCAR arasında qazpaylayıcı şəbəkə olan DESFA-nın özəlləşdirilməsinə dair aparılan danışıqlar nəticəsiz qalıb. "APA-Economics" "Wall Street Journal" nəşrinə istinadən xəbər verir ki, Yunanıstan hökuməti DESFA-nın səhmlərinin 66%-nin satılmasına növbəti dəfə maneə yaradıb.
SOCAR ilk olaraq 400 mln. avro olan investisiyanın məbləğini azaltmağı təklif edib. Yunanıstanın Energetika Nazirliyinin rəsmisi isə bildirib ki, bu təklifin reallaşdırılması qeyri-mümkündür və tenderin ləğvinə səbəb ola bilər.
"Beynəlxalq kreditorlarla aparılacaq məsləhətləşmələrdən sonra gələn həftə Yunanıstan hökuməti yeni tender elan edəcək", - deyə o bildirib.
Bu arada "İnterfax" agentliyi Yunanıstanın Energetika Nazirliyinə istinadən yazır ki, SOCAR DESFA-nın özəlləşdirilməsindən imtina edib.
Yunanıstanın energetika naziri Panos Skurletis də öz "Twitter" hesabında məsələ ilə bağlı şərh verib: "DESFA-nın özəlləşdirilməsinin uğursuzluğunun səbəbi SOCAR tərəfindən Avropa qanunvericiliyinin və rəqabət şərtlərinə riayət olunmamasıdır".
Azərbaycan Dövlət Neft Şirkəti də DESFA qaz operatorunun səhmlərinin alınması ilə bağlı razılaşmanın ləğv edilməsi barədə məlumatı təsdiqləyib. Bunu Trend-ə “SOCAR Energy Greece”in icraçı direktoru Anar Məmmədov deyib.
SOCAR DESFA-nın səhmlərinin 31%-ni Yunanıstan hökumətindən, 35%-ni "Hellenic Petroleum SA" şirkətindən alıb. DESFA üzərində nəzarətin SOCAR şirkətinə verilməsinə qədər Yunanıstan şirkətinin səhmlər paketinə HRADF tərəfindən nəzarət edilir.
DESFA-nın özəlləşdirilməsi prosesinin yubanmasının əsas səbəbi Avropa Komissiyasının Rəqabət üzrə Baş Direktorluğu tərəfindən SOCAR-a qazpaylayıcı operatorun nəzarət paketinin ötürülməsi üzrə apardığı araşdırmalardır. Antiinhisar prinsiplərinə əsaslanan Yunanıstan dövləti SOCAR-ın səhm payının 17%-ni üçüncü tərəfə satmağını təklif edir. Səhm paketini İtaliyanın "Snam" şirkəti almaq niyyətindədir və bununla bağlı SOCAR-la danışıqlar aparılır.
