Pərviz Heydərov: "Belarusda ticarət evlərimizin yaradılması ölkəmizdən qeyri-neft məhsullarının bu ölkəyə ixracına, oradan isə Avropaya ötürülməsi üçün geniş imkanlar aça bilər"
"Azərbaycan və Belarus bir-birinin ərazisində ticarət evləri açacaq". Bunu Azərbaycan Prezidenti İlham Əliyev Bakıda belaruslu həmkarı Aleksandr Lukaşenko ilə keçirilən birgə mətbuat konfransında bildirib.
Ölkə başçısı İlham Əliyev qeyd edib ki, bu gün Azərbaycanın Belarusda, Belarusun isə Azərbaycanda ticarət evlərinin yaradılması barədə qərar qəbul olunub: "Biz bu məsələdə Belarusdan geri qalırıq. Belə ki, Belarusun artıq Azərbaycanda ticarət nöqtələri, obyektləri var. Biz isə hələlik buna yeni hazırlaşırıq. Düşünürəm ki, yaxın vaxtlarda bu istiqamətdə mövqelərimizi bərabərləşdirəcəyik.
Biz münasibətlərimizin dəyərini bir daha geniş müzakirə etdik. Qərara gəldik ki, biz rəqib deyilik. Biz Belarusda olmayan meyvə-tərəvəzləri, digər kənd təsərrüfatı məhsullarını, Belarus isə bizim idxal etdiklərimizi istehsal edir. Buna görə razılaşdıq ki, nəzarəti məqsədyönlü şəkildə həyata keçirək və təəssüf ki, hələlik aşağı səviyyədə olan qarşılıqlı əmtəə dövriyyəsini gücləndirməyə rəvac verək".
Belarusda Azərbaycan ticarət evləri, Azərbaycanda da Belarus ticarət evlərinin açılmasına münasibət bildirən İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, ölkəmizin MDB-də ən sıx və gözəl iqtisadi-siyasi münasibətlərdə olduğu ölkələrdən biri də məhz Belarusdur: "Bu münasibətlər qarşılıqlı hörmət və fayda əsasında təşəkkül tapıb. Hər iki tərəf də bunu daim inkişaf etdirmək arzusundadır. Qeyd edim ki, hər iki ölkə arasında qarşılıqlı əmtəə dövriyyəsi bu gün mövcud olduğu səviyyədən dəfələrlə yüksəlmək və genişlənmək imkanındadır. Elə Belarus prezidenti A.Lukaşenkonun Bakıya sonuncu səfəri zamanı da bu xüsusilə vurğulandı.
Məsələ bundadır ki, dünyada müşahidə olunan ümumi iqtisadi böhranla əlaqədar Azərbaycan-Belarus əlaqələrində də geriləmə qeydə alınıb. Belə ki, A.Lukaşenko da qeyd etdi ki, son bir ildə dünya böhranı ilə əlaqədar bizim ticari-iqtisadi əməkdaşlığımızda geriləmə olub. Ancaq hər iki tərəf razılığa gəlib ki, 2017-ci ildə əmtəə dövriyyəsinin həcmi 700 milyon dollara çatdırılsın. Bu da o deməkdir ki, indiyədək qeydə alınan hətta ən əlverişli səviyyədən belə iki dəfə çox artım əldə etmək qarşıya məqsəd qoyulub. Çünki tərəflər arasında istifadə edilməyən ehtiyatlar çoxdur.
Bu mənada, ölkə Prezidenti İlham Əliyevin Azərbaycanın Belarusda, Belarusun isə Azərbaycanda ticarət evlərinin yaradılması barədə təşəbbüsü qarşı tərəf üçün "göydəndüşmə" oldu. Belə ki, Belarusun Azərbaycanda artıq bir müddətdir ticarət nöqtələri, obyektləri və sair var. Ancaq Azərbaycanın başı enerji daşıyıcılarının istehsalına və satışına qarışdığından, bu kimi məsələlərə diqqət ayrılmayıb. Odur ki, buna yeni hazırlaşırıq. Belarusda ticarət evlərimizin yaradılması ölkəmizdən qeyri-neft məhsullarının bu ölkəyə ixracına, oradan isə Avropaya ötürülməsi üçün geniş imkanlar aça bilər.
Bu gün hər iki ölkə arasında əmtəə dövriyyəsinin həcmi olduqca azdır. Halbuki, Azərbaycan malları Belarus bazarında daha yaxşı və sürətlə realizə oluna bilər. Özü də A.Lukaşenko da demişkən, təkcə Belarus bazarında yox, digər ölkələrdə və regionlarda da. Qarşı tərəfin dövlət başçısı Bakıda səfəri zamanı açıq şəkildə bəyan etdi ki, Belarus Avropanın mərkəzidir və Azərbaycan mallarının həm Avropada, həm də Avrasiya İqtisadi İttifaqında satışına kömək göstərməyə hazırdır. Bizim bu ölkədə ticarət evlərimizin yaradılması buna başlıca vasitə olacaq. Bu evlərdə Azərbaycan öz meyvə-tərəvəzindən tutmuş, şərabçılıq kimi bir çox kənd təsərrüfatı məhsullarının emalından alınan malları təqdim edə və sata bilər. Belarus prezidenti qeyd etdi ki, məsələn, Azərbaycan konyakı Belarusda məşhurdur və yaxud Belarus cənub meyvələrini Afrika ölkələrindən alır. Azərbaycan ticarət evləri vasitəsilə bu sahədə möhtəşəm bir bazar əldə edə bilər".
Günel CƏLİLOVA
