Aqrar sektorun inkişafı istiqamətində atılan addımlar bu sahədə məhsul istehsalının həcminin sürətlə artımına təkan verməkdədir. Bu xüsusda Dövlət Statistika Komitəsi bildirir ki, cari ilin yanvar-oktyabr aylarında kənd təsərrüfatı sahəsində ümumi məhsulun faktiki qiymətlərlə dəyəri 4 milyard 959,7 milyon manat təşkil edib.
Bunun da 2 milyard 511,4 milyon manatı heyvandarlıq, 2 milyard 448,3 milyon manatı isə bitkiçilik məhsullarının payına düşüb. O da bildirilib ki, əvvəlki ilin müvafiq dövrü ilə müqayisədə kənd təsərrüfatı məhsulu istehsalı 1,8 faiz, o cümlədən bitkiçilik məhsulları 1,2 faiz, heyvandarlıq məhsulları isə 2,5 faiz artıb.
Amma Azərbaycan üçün həm də prioritet əhəmiyyət kəsb edən məsələ istehsal olunan kənd təsərrüfatı məhsullarının, yerli istehlakın təmin edilməsi ilə yanaşı, dünya bazarlarına da çıxarılmasıdır. Son vəziyyətin təhlili göstərir ki, dünya bazarlarında Azərbaycanın aqrar məhsullarına əslində böyük tələb var. Bunu ölkəmizdə səfərdə olarkən Belarus prezidenti Aleksandr Lukaşenkonun verdiyi açıqlamalar da təsdiq etdi. Belə məlum oldu ki, elə Belarusun özündə Azərbaycan aqrar məhsullarına tələb heç də az deyil. Məsələn, Lukaşenko Azərbaycandan pambıq və tütün almaqda maraqlı olduqlarını açıq bəyan etdi: "Azərbaycan çox düzgün olaraq pambıqçılığı inkişaf etdirmək, tütün əkini sahələrini artırmaq və gələcəkdə onu satmaq xətti götürüb. Tütün sahəsində biz artıq əməkdaşlıq edirik. Pambıq istehsalının həcminin artımı elə olacaq ki, biz 25-30 min ton, bəlkə də 40 min ton pambıq lifi ala bilərik. Şərabçılıq sənayesi fəal inkişaf edir. Bizim vətəndaşlar Azərbaycan şərablarını tanıyırlar, sizin konyak Belarusda məşhurdur. Buyurun gəlin, biz sizin üçün bazar açarıq. Siz öz məhsullarınızı satın. Sizdə üzüm sahələrinin genişləndirilməsi də çox şeydən xəbər verir".
Lukaşenko Azərbaycan meyvələrini də ölkəsinin bazarlarında görməkdə maraqlı olduqlarını vurğulayır: "Biz cənub meyvələrini praktiki olaraq başqa ölkələrdən alırıq. Azərbaycandan az alırıq. Bunu qaydaya salmaq lazımdır. Bu yaxşı deyil ki, Azərbaycanda ən yaxşı meyvələr yetişdiyi halda biz onları Afrikadan və başqa yerlərdən alırıq. Zənnimcə, bu meyvələrin Belarusda rəqibləri olmayacaq. Belarusda yun yoxdur. Biz iqlim şəraitinə görə Belarusda bu cür yun istehsal edə bilmirik. Bütün dünyadan yun aldığımız halda Azərbaycandan nə üçün almayaq? Gəlin bu istehsalatı birlikdə yaradaq və siz, Belarus bazarı ilə yanaşı, bu cür keyfiyyətli xalça məmulatı istehsal etməyən qonşu dövlətlərin bazarına da çıxış əldə edəcəksiniz". Beləliklə gözləmək olar ki, Azərbaycan aqrar məhsulları artıq tezliklə daha böyük həcmdə Belarus bazarlarına da çıxacaq. Bununla yanaşı, Azərbaycan digər istiqamətlərdə də ixrac imkanlarını genişləndirir. "Made in Azerbaijan" brendinin xaricdə tanıdılması istiqamətində hökumətin dəstəyi ilə fəal işlər görülür. Xatırladaq ki, Azərbaycan məhsulunun, "Made in Azerbaijan" brendinin xaricdə tanıdılması istiqamətində ilk ixrac missiyası Çində təşkil olunub. Bu səfərdən sonra 500 min şüşə Azərbaycan şərabı Çinə satılacaq. Növbəti belə missiya Dubay Əmirliyində keçirilib. Dubaya mineral sular, meyvə şirələri, ət və süd məhsulları, meyvə-tərəvəz, bal istehsalçılarından ibarət ixrac missiyası öz məhsullarını təklif edib. Artıq bu istiqamətdə də Azərbaycan ixracının artması müşahidə olunur. Belə ki, 2016-cı ilin yanvar-sentyabr aylarında Azərbaycanla Birləşmiş Ərəb Əmirlikləri arasında ticarət əlaqələri 24 faiz artıb. Özü də bu təkcə turizm, yük daşımaları hesabına yox, həm də kənd təsərrüfatı, emal, sahələri hesabına baş verib. Bundan əlavə, Birləşmiş Ərəb Əmirlikləri investorlarının iştirakı ilə Azərbaycanda yeni emal müəssisələrinin yaradılması üçün potensial genişdir. Birləşmiş Ərəb Əmirlikləri şirkətlərinin ölkəmizdə fəaliyyət göstərən sənaye parklarında yaradılmış imkanlardan yararlanması üçün də əməli addımlar atılır. Bakı Beynəlxalq Dəniz Ticarət Limanının tikinti layihəsi üzrə ilk mərhələnin başa çatması, "Şimal-Cənub" beynəlxalq nəqliyyat dəhlizinin inkişafı istiqamətində işlərin davam etdirilməsi bu sahədə əlaqələrin genişləndirilməsinə, Birləşmiş Ərəb Əmirlikləri yüklərinin Azərbaycan üzərindən daşınmasına geniş imkanlar yaradır. Hələlik isə məlum olan odur ki, "Made in Azerbaijan" brendi ilə bağlı təşviqat tədbirləri davam etdiriləcək, digər ölkələrdə də sərgilər təşkil olunacaq. Bu, nəticə etibarilə Azərbaycan məhsullarının xaricdə tanıdılması istiqamətində çox əhəmiyyətli addım sayılır. Digər tərəfdən bu, aqrar sahədə də ixrac imkanlarını genişləndirir.
Tahir TAĞIYEV
