Nüsrət İbrahimli: "Əhalinin həssas təbəqəsinə aid olan ailələrin mənzillə təmin olunması üçün ayrıca sosial evlərin tikilməsi təqdirəlayiqdir"
Uzun müddətdən bəri müzakirəsi aparılan sosial mənzil məsələsi artıq həllini tapıb. Vətəndaşların mənzil-məişət şəraitinin yaxşılaşdırılması məqsədilə nəzərdə tutulan ilk binaların hansı ərazidə tikiləcəyi artıq ictimaiyyətə açıqlanıb.
Bildirilir ki, Azərbaycanda sosial təyinatlı mənzillərin (evlərin) sayı artırılacaq. Bu məsələ Milli Məclisə təqdim olunmuş "Azərbaycanın 2017-ci il və gələn üç il üzrə sosial-iqtisadi inkişaf konsepsiyası" layihəsində əks olunub. Layihədə qeyd olunur ki, əhalinin, o cümlədən məcburi köçkünlərin sosial təminat sistemi daha da təkmilləşdiriləcək, sosial xidmət göstərən dövlət müəssisələrinin maddi-texniki bazasının gücləndirilməsi, sosial xidmətlərin növləri və şəbəkəsinin genişləndirilməsi ilə yanaşı, bu sahədə fəaliyyət göstərən qeyri-dövlət və qeyri-kommersiya təşkilatları inkişaf etdiriləcək.
Yaşayış üçün təhlükəli obyektlərdə məskunlaşmış məcburi köçkünlərin köçürülməsi davam etdiriləcək. Əhalinin həssas qruplarının sosial mənzillərdə yaşaması üçün hüquqi zəmin yaradılacaq.
Mövzu ilə bağlı fikir bildirən daşınmaz əmlak məsələləri üzrə ekspert Nüsrət İbrahimli "Bakı-Xəbər"ə açıqlamasında qeyd etdi ki, bu hal mənzil təminatı zəif olan ailələrin sosial rifahına müsbət təsir edəcək: "Sosial mənzillərin sayının artırılması mənzil bazarında şişirdilmiş qiymətlərin qarşısını alacaq. Bu gün o seqment bazarında ucuz mənzillərə aid olan təklif portfelində mənzil qıtlığı hiss olunur. Sosial mənzillərin tikilməsi o seqmentin dolmasına kömək edəcək. Bu sahədə stabillik hiss olunar. Sosial təyinatlı mənzillərin sayının artırılmasının daşınmaz əmlak bazarı üçün əhəmiyyəti böyükdür".
Həmsöhbətimiz qeyd etdi ki, sosial evlərin saylarının artırılmasının əhəmiyyəti ondan ibarətdir ki, bu evlərin tikintisi ilk növbədə aztəminatlı ailələrin evlə təmin olunmasına imkan verəcək: "Bu evlərin sayının artırılması həm də məcburi köçkünlərin sosial durumuna müsbət təsir edəcək. Elə ailələr var ki, onlar yaşayış üçün uyğun olmayan binalarda yaşayır. Həmin mənzillərdə onların həyatı risq altındadır. Əhalinin həssas təbəqəsinə aid olan ailələrin mənzillə təmin olunması üçün ayrıca sosial evlərin tikilməsi təqdirəlayiqdir".
Günel CƏLİLOVA
