Ceyhun Xəlilzadə: "Bu, elektrik enerjisi və təbii qazın sərfiyyatına daha qənaətlə yanaşmağa müsbət təsir göstərəcək"
Tarif Şurası təbii qazın və elektrik enerjisinin ölkədaxili tariflərinin tənzimlənməsi barədə qərar verib. Qərara əsasən, bu kommunal sahələrdə əhali üçün müvafiq kvota müəyyənləşdirilib.
Belə ki, elektrik enerjisinin aylıq istehlak həcminin 250 kVts-a qədər olan hissəsi köhnə tariflə - yəni 7 qəpik, aylıq istehlak həcminin 250 kVts-dan çox olan hissəsi isə 11 qəpiklə hesablanacaq. Qeyri-əhali üçünsə elektrik enerjisinin tarifi 9 qəpik olub. Qazın illik istehlak həcminin 1500 kubmetrədək olan hissəsi üçün köhnə tarif - 100 manat, istehlak həcmi 1500 kubmetrdən çox olan hissəsi üçün isə 200 manat müəyyən edilib.
Qərar 1 yanvar 2017-ci ildə qüvvəyə minəcək. Yeni tarif sistemi ölkədə ilk dəfə kommunal sahədə differensiallaşma və optimallaşdırmanın tətbiqidir. Azərbaycanda bəzi kommunal xidmətlər sahəsində tətbiqinə başlanan differensial ödəniş sistemi artıq bir çox ölkələrdə istifadə edilir. O baxımdan bu cür ödəniş sisteminin tətbiqi istehlakçılar arasında qaz və elektrik enerjisindən istifadə zamanı israfçılığın aradan qaldırılmasına, həmçinin paylayıcı şəbəkələrin üzərinə düşən gərginliyin həcmini azaltmağa xidmət edir.
Maraqlıdır, bəs ekspertlər buna necə yanaşır?
Məsələyə münasibət bildirən iqtisadçı-ekspert Ceyhun Xəlilzadənin sözlərinə görə, bu, istehlakçıların enerjidən daha qənaətlə istifadə etməsinə təkan verəcək: "Tarif Şurasının son qərarları sosial ədalət prinsiplərinə əsaslanıb. Vətəndaşların gündəlik istifadəsi üçün qaz və elektrik enerjisinin qiymətinin köhnə tariflərdə saxlanması ədalət prinsiplərinə əməl olunmasından irəli gəlir. Tarif Şurasının qərarları kommersiya şirkətləri ilə sadə vətəndaşların ödənişində fərq yaradacaq. Bu da sosial ədalət prinsipini təmin edəcək. Hər bir ailə üçün 1500 kubmetr qaz bəs edir. Ancaq ticarət və istehsalat müəssisələrində daha çox qaz sərf edilir. Hazırda "kombi" sistemləri quraşdırılıb ki, bu da aşağı təzyiqlə işləməklə yanaşı, qaza çox qənaətcildir. Qərarda isə bildirilir ki, təbii qazın pərakəndə satış tarifi əhali üzrə illik istehlak həcmi 1500 kubmetrədək olan istehlakçılar üçün dəyişdirilməyərək, bir kubmetr üçün mövcud 10 qəpik səviyyəsində saxlanıb. Elektrik enerjisinin pərakəndə satış tarifi isə sosial siyasətə uyğun olaraq, əhali üzrə aylıq elektrik enerjisi istehlakı 250 kilovatsaatadək olan istehlakçılar üçün dəyişdirilməyərək mövcud 7 qəpik səviyyəsində saxlanıb. Tarif Şurasının qərarları elektrik enerjisi və qazdan adi qaydada istifadə edən sadə vətəndaşlara təsir göstərməyəcək. Bu qərarlar, eyni zamanda, elektrik enerjisi və təbii qazın sərfiyyatına daha qənaətlə yanaşmağa və izafi istehlakın qarşısının alınmasına müsbət təsir göstərəcək".
Vidadi ORDAHALLI
