İldırım Qurbanov: "Hesab edirəm ki, iki ölkə ixracyönümlü kənd təsərrüfatı məhsullarının istehsalında..."
Belarus prezidenti Aleksandr Lukaşenkonun ölkəmizə səfəri zamanı ikitərəfli münasibətlərin inkişafı yönündə bir sıra razılaşmalar əldə olunub. Azərbaycanla Belarus arasında sazişlərin imzalanmasından sonra prezidentlər mətbuata açıqlama verib.
Prezident İlham Əliyev bildirib ki, son bir ildə dünya böhranı ilə əlaqədar ölkələr arasında ticari-iqtisadi əməkdaşlıq geriləyib: "Gələn il biz əmtəə dövriyyəsinin həcmini 700 milyon dollara çatdıra bilərik. Bu isə ən əlverişli ildəkindən, demək olar ki, iki dəfə çoxdur".
Prezidentin sözlərinə görə, artıq əldə olunmuş razılaşmaların təcrübədə gerçəkləşdirilməsi müzakirə edilib, bir çox məsələlər üzrə nümayəndə heyəti üzvlərinin məlumatları dinlənib, eləcə də müvafiq nazirlərə, həmçinin hökumətlərarası komissiyanın həmsədrlərinə tapşırıqlar verilib ki, qısa müddətdə - bir ay ərzində ölkələrimiz arasında əmtəə dövriyyəsinin xeyli və sürətlə artırılması barədə yeni fəaliyyət planı hazırlasınlar.
Prezident Aleksandr Lukaşenko isə çıxışında bildirib ki, iki ölkə arasında hələ istifadə edilməyən ehtiyatlar çoxdur: "Biz burada ən müasir müəssisə tikməyə hazırıq ki, Azərbaycandakı həmkarlarımız bu müəssisənin nə demək olduğunu öz gözləri ilə görə bilsin. Biz qarşılıqlı surətdə hazırıq ki, Azərbaycan öz mallarını Belarus bazarında daha geniş təqdim etsin. Özü də təkcə Belarus bazarında yox, - hər halda bu, Avropanın mərkəzidir. Azərbaycan mallarının həm Avropada, həm də Avrasiya İqtisadi İttifaqında satışına kömək göstərməyə hazırıq".
Bütövlükdə, ekspertlər iki ölkə arasında əmtəə dövriyyəsinin 700 milyon dollara çatdırılması perspektivlərini necə dəyərləndirir?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun fikrincə, prinsipcə, bu mümkündür: "Belarus əsasən kənd təsərrüfatı ölkəsidir. Sovet dönəmində iki ölkə arasında sıx iqtisadi əlaqələr mövcud olub. Hesab edirəm ki, iki ölkə ixracyönümlü kənd təsərrüfatı məhsullarının istehsalında, emalında, tədarükündə və ticarətində əməkdaşlıq edə bilər. Yəni gələcəkdə qeyri-neft sektoruna aid məhsulların birgə istehsalı, onun dünya bazarına, o cümlədən Avropa bazarına ixrac olunmasında birgə əməkdaşlıq mümkündür. Belarusla bizim çox yüksək səviyyədə münasibətlərimiz var, həm iqtisadi, həm də siyasi sahədə. O baxımdan iki ölkə arasında əmtəə dövriyyəsinin artırılmasında elə bir problem yoxdur. Azərbaycanın meyvə-tərəvəzi Rusiya və digər ölkələrə ixrac olunur. Hesab edirəm ki, Belarusun timsalında Azərbaycanın bu məhsulları üçün böyük bazar var. Sadəcə, bunu reallaşdırmaq üçün optimal mexanizm tapılmalıdır. Buna nail ola bilsək, Azərbaycanda ixrac məqsədilə daha çox məhsul istehsal olunacaq. Belarus vasitəsilə həmin məhsullar Avropa bazarına yol tapacaq. Bu da daha çox valyutanın ölkəyə gəlməsi deməkdir". Vidadi ORDAHALLI
