Rəşad Həsənov: "Hazırda MİS-lərin işlərini də bələdiyyələr yüksək səviyyədə həyata keçirir və bu səbəbdən "JEK"lərin gördüyü iş bələdiyyələrə həvalə olunmalıdır"
Uzun illərdir mənzil-istismar sahələrinin fəaliyyəti, demək olar, dondurulub. Məlumat üçün bildirək ki, mənzil-istismar sahələri (MİS) bizə sovet dövründən miras qalıb. Dövlət mənzil fondunun istismarı üzrə təsərrüfat hesablı təşkilat olan MİS-lər 1959-cu ildə yaradılıb və SSRİ-də mənzil təsərrüfatının ilkin həlqəsi hesab olunub.
Bu qurumlar yaradılanda mənzil-istismar kontorları adlanıb. "JEK" adı da məhz həmin dövrdən məişət dilimizə oturuşub. Sonrakı illərdə MİS-lərin adları dəyişsə də, bu günə kimi hamı bu qurumu "JEK" adlandırır.
Fəaliyyəti bilinməyən mənzil-istismar sahələrinin, el dili ilə desək, "JEK"lərin ləğvi məsələsi yenidən gündəmə gəlib. Buna səbəb gələn ilin dövlət büdcəsində bu quruma vəsaitin nəzərdə tutulmamasıdır.
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Vahid Əhmədov media nümayəndələrinə verdiyi məlumatda bildirib ki, bu qurumların gördüyü iş bələdiyyələrə həvalə oluna bilər və bu məqsədlə də büdcədə 5 milyona yaxın vəsait nəzərdə tutulub.
İqtisadçı Rəşad Həsənov "Bakı-Xəbər"ə açıqlamasında qeyd etdi ki, mövcud qanunvericiliyə görə, MİS-lər bir neçə il öncə fəaliyyətini dayandırmalı idi: "Amma sonradan prosesin hansı formada davam etdiriləcəyi ilə bağlı qeyri-müəyyənliyin ortaya çıxması nəticəsində həmin idarələr öz fəaliyyətini yarı qeyri-rəsmi formada davam etdirdi. Bu sahədə ciddi boşluq var idi. Daha sonra ölkədə Mənzil Mülkiyyətçilərinin Müştərək Cəmiyyətinin yaradılması ilə bağlı hüquqi baza formalaşdırıldı. Təxminən 30-a yaxın bu tipli qurum fəaliyyət göstərir".
Həmsöhbətimizin sözlərinə görə, əvvəlki dövrlərdə inşası tamanlanmış binalarda mənzil-istismar sahələri fəaliyyət göstərirdi: "Mənzil-istismar sahələrinin, bələdiyyələrin və yerli icra qurumlarının səlahiyyətləri həddindən artıq qarışıqdır və bir-birinə oxşardır. Bu qurumların optimallaşdırılması lazım idi. Yerli icra qurumlarının səlahiyyətlərini bələdiyyələr çox normal şəkildə icra edə bilir. O cümlədən, MİS-lərin işlərini də bələdiyyələr yüksək səviyyədə həyata keçirir. Bu səbəbdən də idarəetmənin təkmilləşdirilməsi vacibdir. Bu baxımdan 2017-ci ildə mənzil-istismar sahələrinin ləğv olunması gündəmdədir".
Günel CƏLİLOVA
