Günel Fərhadqızı: "Ölkəmiz üçün yaxşı effekt verəcək bir təşəbbüsdür"
Xarici ölkələrə getmiş Azərbaycan vətəndaşları olan ixtisaslı kadrların geriyə qayıdışı stimullaşdırılacaq. Bu barədə Milli Məclisə təqdim olunmuş "Azərbaycanın 2017-ci il və gələn üç il üzrə iqtisadi-sosial inkişaf konsepsiyası" layihəsində qeyd olunub.
Layihəyə görə, stimullaşdırmada məqsəd həmin şəxsləri ölkənin iqtisadi inkişafına cəlb etməkdir. Layihədə ölkə iqtisadiyyatının dinamik inkişafı nəticəsində əmək miqrasiyasının genişlənəcəyini nəzərə alaraq, əmək miqrasiyası proseslərinin idarə olunmasının təkmilləşdirilməsi nəzərdə tutulur.
Layihəyə əsasən, daxili əmək bazarının ixtisassız əcnəbi işçi qüvvəsi axınından qorunması təmin ediləcək, yüksək ixtisaslı mütəxəssislərin cəlbinə üstünlük veriləcək. Əcnəbiləri işə cəlb edən işəgötürənlər və yüksək ixtisaslı əcnəbilər yerli kadr hazırlığına cəlb ediləcək.
Bununla yanaşı, başqa ölkələrdən gələn qaçqınların sosial təminatlardan yararlanmasını tənzimləyən işlək mexanizm yaradılacaq.
Qanun layihəsinin qüvvəyə minməsinin ölkə üçün nə kimi müsbət tərəfləri ola bilər?
Ekspert Günel Fərhadqızı qəzetimizə açıqlamasında bildirdi ki, bu layihənin təqdim olunması çox gözəl təşəbbüsdür: "Bu məsələnin sosial inkişaf konsepsiyasında yer alması daha məqsədəuyğun sayılıb. Çünki dəfələrlə bəyan edilib ki, ölkəmiz yeni bir iqtisadi inkişaf yoluna qədəm qoyur. Bunun adına postneft iqtisadiyyatı da deyirlər. Bu istiqamətdə inkişafa nail olmaq üçün ixtisaslı kadrlara böyük ehtiyac var. Azərbaycanın bu sahədə zəngin bazası olub. 90-cı illərdə daha çox ixtisaslı kadrlar bir qədər yüksək məvacib almaq istəyilə ölkəni tərk etdi. Prosesin kütləviliyi həmin illərə təsadüf etdiyindən, o dövrü xüsusi vurğuladım. Sonrakı dönəmlərdə də belə hallar olub. Azərbaycan yüksək ixtisas sahibi olan soydaşlarımızın ölkəyə qaytarılması üçün kifayət qədər stimullaşdırıcı addımlar ata bilər. Çünki onlar üçün bu daha cəzbedici olar. Sadə dillə desək, vətəndən kənarda hansısa bir soydaşımıza orada verilən qədər əməkhaqqı verilsə, təbii ki, o burada işləməyə üstünlük verəcək. Təqdim olunan layihədə əcnəbi ixtisaslı kadrların da ölkəyə gəlişi və burada səmərəli fəaliyyət göstərməsi, təcrübəsini vətəndaşlarımızla bölüşməsi üçün lazımi bəndlər salınıb. Yeni konsepsiyada belə detalların yer alması niyyətin və zərurətin ciddiliyindən xəbər verir. Hesab edirəm ki, ölkəmiz üçün yaxşı effekt verəcək bir təşəbbüsdür".
Məhəmmədəli QƏRİBLİ
