Vahid Əhmədov: "Maaşların artırılması mühüm hadisədir"
Gələn il Azərbaycanda minimum əməkhaqqının, pensiyaların minimum məbləğinin və yaşayış minimumunun həddinin mərhələ-mərhələ artırılması nəzərdə tutulur. Sözügedən məsələ Milli Məclisə təqdim olunmuş "Azərbaycanın 2017-ci il və gələn üç il üzrə iqtisadi-sosial inkişaf konsepsiyası"nın layihəsində nəzərdə tutulub.
Bununla yanaşı, layihədə qeyd olunub ki, gələn il həmçinin əlilliyə, ailə başçısının itirilməsinə, sağlamlıq imkanları məhdud uşaqlara, əmək xəsarəti nəticəsində əmək qabiliyyətini itirən şəxslərə aylıq (və birdəfəlik borc) ödənclərin, müddətli hərbi qulluqçu və bir yaşına qədər uşağı olan ailələrin aylıq müavinətlərinin, fəxri adları olanların, fərdi təqaüdlərin, Prezident təqaüdünün, milli qəhrəmanların, 20 Yanvar və digər kateqoriyalardan olan şəhid ailələri və müharibə əlilləri, Çernobıl əlillərinin, müharibə veteranlarına aylıq, uşağın doğulması və radiasiya qəzası nəticəsində zərər çəkərək əlil olan şəxslərə birdəfəlik müavinətlərin artırılması istiqamətində tədbirlər həyata keçiriləcək.
Layihədən belə görünür ki, sosial kateqoriyaya aid olan bütün sahələrdə artımlar olacaq. Müşahidələr göstərir ki, gələnilki büdcənin həcmi əvvəlkilərə nisbətən az olsa da, aztəminatlı ailələrin vəziyyəti nəzərə alınıb. Bunun qarşılığında büdcədə iri investisiya layihələrinin həyata keçirilməsi təxirə salınıb. Bütün bunların fonunda, gələn il əməkhaqqı və pensiyaların mərhələ-mərhələ artırılmasına ekspertlər necə yanaşır? Sözügedən məsələni dəyərləndirən iqtisadçı, millət vəkili Vahid Əhmədov buna müsbət prizmadan yanaşır. Onun fikrincə, buna müəyyən zərurət var: "Manatın xarici valyuta qarşısında ucuzlaşmasının davam etdiyi zamanda pensiya, sosial müavinətlər, dövlət büdcəsindən maliyyələşən təşkilatlarda işləyən insanların əməkhaqlarının artırılması zərurəti yaranır. Xüsusilə təhsil, səhiyyə, müdafiə xərcləri müəyyən qədər artırılmalıdır. Dövlət büdcəsi müzakirə olunanda bu məsələlər qaldırılır. Məlumdur ki, cənab Prezident 2017-ci ilin dövlət büdcəsində sosial layihələrə daha çox diqqət ayırıb. Dövlət büdcəsinin xərc hissəsinin 6,6 milyard manatı sosial layihələrə ayrılıb, bu da 2016-cı ildən 4 faiz çoxdur. Sosial xərclərin maliyyələşməsində problemlər yaşanmasına baxmayaraq, artım olacaq. Maaşların artırılması mühüm hadisədir. 2017-ci ildən sonra hər il bu məsələyə baxılacaq. Müəyyən qədər, imkan daxilində əməkhaqları, sosial müavinətlər, pensiyalar artırılacaq".
Vidadi ORDAHALLI
