Zakir Əhmədov: "Daşınmaz əmlakın satışının sadələşdirilmiş vergiyə cəlb edilməsinə başlanıb"
"Azərbaycanın 2017-ci il üzrə sosial-iqtisadi inkişaf konsepsiyası"nda bir sıra məqamlara toxunulub. Eyni zamanda, müəyyən proqnozlar öz əksini tapıb. Konsepsiyada qeyd olunub ki, gələn il tikinti sektorundan sadələşmiş vergi daxilolmaları 78 milyon manat olacaq. 2016-cı il üzrə bu göstərici 35 milyon proqnozlaşdırılır. Göründüyü kimi, sözügedən sahədən daxil olan vergilərin həcmində ciddi artım gözlənir.
O da məlumdur ki, qeyri-neft sektorunun inkişafına müsbət təsir edən əsas amillərdən biri səmərəli vergi siyasətinin həyata keçirilməsidir. Azərbaycanın ildən-ilə təkmilləşən vergi sistemi sahibkarlıq fəaliyyətinin genişlənməsi, investisiyaların təşviqi baxımından mühüm rol oynayıb. Son illər bu sahədə aparılan davamlı islahatlar qeyri-neft sektorunun inkişafına mühüm zəmin yaradıb. Əlverişli investisiya mühitinin mövcudluğu və ölkədə iqtisadi fəallığın yüksəldilməsi vergi ödəyicilərinin sayının əhəmiyyətli dərəcədə artımına imkan verib. Vergi sisteminin texnoloji cəhətdən modernləşdirilməsi, inzibatçılığın keyfiyyətcə yaxşılaşdırılması sayəsində vergi daxilolmalarının həcmi 2006-2015-ci illər üzrə 2,6 dəfə, qeyri-neft sektoru üzrə 4,9 dəfə artıb. Daxilolmaların strukturunda qeyri-neft sektorunun payının 80 faizə yaxınlaşması bu sektordan əldə olunan gəlirlərin artdığını göstərir.
Maraqlıdır, ekspertlər tikinti sektorunda sadələşmiş vergi daxilolmalarının artacağını necə izah edirlər? Məsələyə münasibət bildirən ekspert Zakir Əhmədovun fikrincə, bunu bir sıra amillər şərtləndirir: "Məsələ ondadır ki, cari ildən tikinti sektorunun vergiyə cəlb olunmasında mühüm təkmilləşdirilmələr aparılıb. Bina tikintisi fəaliyyəti ilə məşğul olan şəxslərə vergitutma rejimində seçim hüququ verilib. Həmçinin, daşınmaz əmlakın satışının sadələşdirilmiş vergiyə cəlb edilməsinə başlanıb. Bu amillər, eləcə də müxtəlif vergi növləri üzrə vergi bazasının genişləndirilməsi və vergidən yayınma hallarının qarşısının alınması istiqamətində məqsədyönlü tədbirlər həyata keçirilib. Bütün bunlar qeyri-neft vergi gəlirlərinin həcminin artmasına öz təsirini göstərməkdədir. O baxımdan gələn il tikinti sektorundan daxil olan vergilərin artması gözlənir. Hazırda ölkədə tədiyyə balansının tarazlaşdırılması, ölkəyə daxil olan valyutanın həcminin çıxan valyutanın həcminə uyğunlaşdırılması üçün bu prosesə yerli sahibkarlarla yanaşı, xarici investisiyaların cəlbi yaxşı olardı. Çünki xarici investisiya özü ilə müasir idarəetmə, yeni texnologiya və xarici təcrübə gətirir".
Vidadi ORDAHALLI
