Vüqar Bayramov: "Mənzil bazarında qiymətlər yüksək olduğu üçün 50 min manatlıq maksimum hədd də kifayət etmirdi və bu baxımdan rəqəmin 2 dəfə artırılmasına ehtiyac var idi"
Xəbər verildiyi kimi, ölkədə ipoteka kreditlərinin məbləği artırıldı. "Azərbaycan İpoteka Fondu" Açıq Səhmdar Cəmiyyətinin vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası"na uyğun olaraq, ASC tərəfindən kreditlərin müddəti, maksimum məbləği, faiz dərəcələri və həmçinin ipoteka kreditləri hesabına alınan yaşayış sahəsinin Bakı şəhəri, habelə onun qəsəbə və kəndləri üzrə zonalar, ölkənin digər şəhər və rayon əraziləri üzrə 1 (bir) kvadratmetri üçün orta bazar qiymətləri müəyyən edilib.
"Azərbaycan İpoteka Fondu" ASC-nin məlumatına əsasən, kreditlərin faiz dərəcələri və müddətləri dəyişməsə də, ilkin ödəniş məbləği konkretləşdirilib, maksimal kredit məbləği isə artırılıb. Belə ki, adi ipoteka üzrə maksimal faiz dərəcəsi 8, maksimal müddət 25 il, güzəştli ipoteka üzrə maksimal faiz dərəcəsi 4, maksimal müddət 30 il olaraq qalsa da, hər iki kaqeqoriya üzrə maksimal kredit məbləği 100 min manata qaldırılıb. İlkin ödəniş məbləği isə adi ipoteka üzrə 15-25 faiz, güzəştli ipoteka üzrə 15 faiz müəyyən edilib.
İpoteka krediti məbləğinin artırılması ilə bağlı fikir bildirən iqtisadçı-ekspert Vüqar Bayramov qeyd etdi ki, maksimum məbləğin artırılması zəruri idi: "Həm sosial, həm də adi ipoteka kreditləri üçün maksimum məbləğin 50 min manatdan 100 min manatadək artırılması, dövlət büdcəsindən ayrılacaq 50 milyon manatla yanaşı, istiqrazlar hesabına əlavə 50 milyon manatın gələn il ipoteka kreditləşməsinə yönəldilməsi və elektron ipoteka sisteminin tətbiqi bu sahədə təqdirəlayiq addımlardır. Elektron müraciətin tətbiqi çox vacib idi. Çünki bir sıra banklarda ipoteka almaqda süründürməçilik və hətta əlavə ödənişin istənilməsi halları var idi ki, bu da kreditə əlçatanlığı xeyli dərəcədə məhdudlaşdırırdı. Elektron müraciət bu neqativ halları aradan qaldıra bilər. Bunun üçün elektron müraciətlərin şəffaf və hesabatlı şəkildə öyrənilməsi və cavablandırılmasına nəzarətin gücləndirilməsi vacibdir. Eyni zamanda, mənzil bazarında qiymətlər yüksək olduğu üçün 50 min manatlıq maksimum hədd də kifayət etmirdi və bu baxımdan rəqəmin 2 dəfə artırılmasına ehtiyac var idi".
Günel CƏLİLOVA
