Eyyub Hüseynov: "Yerli mallar üçün vahid məlumat bazasının yaradılması ölkədə istehsal olunan istənilən növ məhsulun satışına müsbət təsir edəcək"
Xəbər verildiyi kimi, Azərbaycanda yerli malların vahid məlumat bazası yaradılacaq. Bu barədə İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı jurnalistlərə açıqlamasında deyib.
O qeyd edib ki, Azərbaycanda istehsal olunan məhsullarla bağlı bütün məlumatları əks etdirəcək portal yaradılır: "Məqsəd sahibkarlıq sahəsində son illər əldə olunan inkişafın davamlılığını təmin etmək, yerli malların ənənəvi və yeni bazarlara çıxarılması imkanını artırmaq, beynəlxalq bazara inteqrasiya prosesini sürətləndirməkdir. İstehsal olunan mallar və həmin malların istehsalçıları barədə məlumatları əks etdirəcək portal qısa müddət ərzində istifadəyə veriləcək. İslahatların Təhlili və Kommunikasiya Mərkəzi bununla bağlı işləri davam etdirir. Bu, yerli məhsulların xarici bazarlara çatdırılmasına da öz töhfəsini verəcək".
V.Qasımlı diqqətə çatdırıb ki, hazırda logistika və nəqliyyat şirkətləri ilə də danışıqlar aparılır. Biz həm də hazırda Azərbaycanın yerli məhsullarının portalının beynəlxalq səviyyədə tanınmış çox nüfuzlu portallarla, elektron ticarət saytları ilə inteqrasiya edilməsi üzərində işləyirik. İslahatların Təhlili və Kommunikasiya Mərkəzi "Made in Azerbaijan" brendinin daha da tanıdılması ilə bağlı öz fəaliyyətini davam etdirir.
Yerli malların vahid məlumat bazasının yaradılması barədə fikir bildirən Azad İstehlakçılar Birliyinin (AİB) rəhbəri Eyyub Hüseynov qəzetimizə açıqlamasında qeyd etdi ki, həmin portal sayəsində Azərbaycanda istehsal olunan bütün məhsullar sertifikatlaşdırılacaq: "Həmin portal sayəsində istehlakçılar ölkəmizdə istehsal olunan məhsullardan xəbərdar olacaq. Yəni vətəndaşlar hansı malların yerli istehsal olmasını tanıyacaq. Yerli malların vahid məlumat bazasının yaradılması müsbət bir addımdır".
Həmsöhbətimiz hesab edir ki, yerli mallar üçün vahid məlumat bazasının yaradılması ölkədə istehsal olunan istənilən növ məhsulun satışına müsbət təsir edəcək: "Yaxşı olar ki, həmin portalda istehlakçıların istəyi də nəzərə alınsın. Yəni onların hansı məhsula olan tələbatı və ya hansısa malın necə təqdim olunması ilə bağlı fikirləri də yer alsın. Beləliklə, istehlakçıların səsi eşidilər".
E.Hüseynov onu da əlavə etdi ki, vahid məlumat bazasının yaradılması yerli məhsulların xarici ölkələrə ixracını artıra bilər. Belə olan təqdirdə Azərbaycan məhsullarının sorağı dünyanın istənilən ölkəsinə yayılar və qarşılıqlı razılaşma ilə yerli istehsal olan mallar xarici ölkələrə ixrac olunar.
Günel CƏLİLOVA
