Qulu İsmayılov: "Rusiyada dövlət qulluğunda çalışıb sonra vətənə dönən çoxlu sayda vətəndaşımız var"
"Azərbaycan və Rusiya arasında pensiya təminatı və əmək miqrasiyası sahələrində əməkdaşlıq üzrə iki saziş imzalanacaq". Bunu Bakıda Rusiya Sosial Sığorta Fondunun nümayəndələri ilə görüşü zamanı Azərbaycanın əmək və əhalinin sosial müdafiəsi naziri Səlim Müslümov deyib.
Nazirin sözlərinə görə, Azərbaycan pensiya təminatı sahəsində Rusiya ilə ikitərəfli sazişi olmayan yeganə MDB dövlətidir.
Səfərdə məqsəd ölkəmizin əmək və sosial müdafiə sahəsində avtomatlaşdırılmış iş sistemlərinin öyrənilməsi olub. Bununla əlaqədar səfər çərçivəsində Rusiya Sosial Sığorta Fondunun Azərbaycan Respublikasının Əmək və Əhalinin Sosial Müdafiəsi Nazirliyinə rəsmi müraciəti nəzərə alınmaqla, Fondun əməkdaşları üçün ölkəmizin əmək və sosial müdafiə sahəsində avtomatlaşdırılmış iş sistemlərinə dair seminar keçirilib.
Bu sazişin imzalanmasından sonra yenilik hansı sayda şəxsə təsir edəcək?
Ekspert Qulu İsmayılovun sözlərinə görə, bu məsələdə konkret rəqəm demək çətindir: "Ancaq iki ölkənin bu sahədə yaşadığı bir sıra problemlər öz həllini tapacaq. Bu, eyni zamanda, iki ölkə arasında əmək və sosial müdafiə sahəsində təcrübə mübadiləsinin aparılmasına şərait yaradacaq. Azərbaycan bu sahədə böyük uğurlara imza atıb. Sosial müdafiə sahələrində idarəetmə və xidmətlər sisteminin elektronlaşdırılması və şəffaflaşdırılması yönündə aparılan islahatlar prosesə təkan verəcək. Hesab edirəm ki, belə bir sazişin imazalanması miqrantlarla bağlı pensiya təminatı sahəsində yaşanan informasiya kasadlığını yoluna qoyacaq. Əsasən soydaşlarımızı daha çox narahat edən problem həllini tapacaq. Bilirsiniz ki, Rusiyada çoxlu sayda soydaşımız çalışır. Onlar həmin ölkənin pensiya fondlarına ödənişlər edir. Sonra vətənə qayıdıb təqaüdə çıxanda həmin vəsaitlər nəzərə alınmır. Elə adamlar var ki, həm Rusiyadan, həm də Azərbaycandan pensiya alır. Rusiyada dövlət qulluğunda çalışıb sonra vətənə dönən çoxlu sayda vətəndaşımız var. Onlarla bağlı problem də həllini tapacaq. Burada ən önəmli olan qarşılıqlı informasiya mübadiləsinin asanlaşmasıdır. Bu da sazişdən sonra mümkün olacaq. İstənilən halda, müsbət dəyərləndirilməlidir. Mövzu ilə bağlı daha müfəssəl məlumatı qüvvəyə minəcək sazişlə tanış olduqdan sonra vermək mümkündür".
Məhəmmədəli QƏRİBLİ
