Vahid Əhmədov: "Bu çox əhəmiyyətli prosesdir və axıra çatdırmaq lazımdır"
Son aylar bir çox müəssisələr kütləvi şəkildə özəlləşdirməyə çıxarılır. Əmlak Məsələləri Dövlət Komitəsinin sədri Kərəm Həsənov bu il hərraclara 500-dən artıq dövlət obyektinin çıxarıldığını bildirib.
Qeyd edək ki, Əmlak Məsələləri Dövlət Komitəsi tərəfindən 20 dekabr tarixində keçirilməsi nəzərdə tutulan yeni hərrac elan olunub. Bu hərraca ümumilikdə 84 dövlət əmlakı olmaqla, 23 səhmdar cəmiyyəti, 26 kiçik dövlət müəssisə və obyekti, 32 istifadəsiz qeyri-yaşayış sahəsi və 3 nəqliyyat vasitəsi çıxarılıb. Hərraca çıxarılan kiçik dövlət müəssisəsi və obyektinin əksəriyyəti altındakı torpaq sahəsi ilə birlikdə özəlləşdiriləcək. Həm torpaq sahəsinin, həm də tikilinin ayrıca qiymətləndirilməsi aparılıb.
Nəzərə alsaq ki, son dövrlər dövlət xərcləri optimallaşdırılır, o baxımdan bu kimi addımların atılması dövlətin yükünün azaldılmasına xidmət edir. Bu da ümumən doğru yanaşmadır. Çünki həmin müəssisələrin saxlanması dövlət üçün əlavə xərc deməkdir. O üzdən, dövlətin nə qədər iqtisadiyyatdan çəkilməsi prosesi baş verərsə, bu bir o qədər dövlətin yükünü azaldar. Çünki, bir sıra hallarda, həmin müəssisələr dövlət büdcəsindən ayrılan dotasiya hesabına fəaliyyət göstərir. Bu da neft gəlirlərinin azaldığı indiki dövrdə sərfəli deyil. Müşahidələr göstərir ki, özəlləşdirmə ilə bağlı həyata keçirilən işlər, nəticə etibarilə, 2017-ci ilin dövlət büdcəsinə xeyir verəcək.
Maraqlıdır, bəs ekspertlərin yeni özəlləşdirmə kampaniyasına münasibəti necədir?
Sözügedən məsələni dəyərləndirən iqtisadçı, millət vəkili Vahid Əhmədovun fikrincə, əvvəlki özəlləşdirmələrdə müəyyən problemlər olsa da, indi bu proses açıq şəkildə aparılır: "Özəlləşdirmə prosesinə ölkə başçısının sərəncamı ilə başlanıb. Bir sıra müəssisələr var ki, özəlləşdirməyə çıxarılmayıb, müəyyən müddət icarəyə verilib. İndi onların siyahısı çıxarılıb. Həm də müəyyən dövlət səhmdar cəmiyyətləri, qurumlarının tərkibində bir sıra xidmət sahələri mütləq özəlləşdirməyə çıxarılmalıdır. Bütün bunlar nəzərə alınaraq Əmlak Məsələləri Dövlət Komitəsi, ölkə başçısının tapşırığına uyğun olaraq, bu sahələri özəlləşdirməyə çıxarıb. Özəlləşmənin ölkəmiz üçün iki müsbət tərəfi var. Birincisi, özəlləşmədən dövlət büdcəsinə müəyyən qədər vəsait daxil olur. İkincisi də özəlləşdirilən obyektin sahibi tapılır. O obyektlər çox da fəaliyyət göstərmirdi. Sahibi tapılandan sonra müəyyən qədər investisiya qoyulur və obyektlər fəaliyyət göstərməyə başlayır. Bu çox əhəmiyyətli prosesdir və axıra çatdırmaq lazımdır. Bir sıra iri dövlət şirkətləri, nazirliklərin tərkibində müəyyən tikinti müəssisələri, xidmət obyektləri var ki, onlar da yavaş-yavaş özəlləşdirilməyə çıxarılmalıdır".
Vidadi ORDAHALLI
