İldırım Qurbanov: "Qeyri-neft sektoruna investisiya cəlbi daha da stimullaşdırılsın"
"Daşınmaz əmlak, özəlləşdirmə və investisiyalar" mövzusunda konfransda Əmlak Məsələləri Dövlət Komitəsinin sədr müavini Rafiq Cəlilov çıxış edərək beynəlxalq tədbirin Azərbaycan üçün əhəmiyyətli olduğunu vurğulayıb:
"Hazırda dövlət əmlakının özəlləşdirilməsi prioritet sahə elan olunub. Yerli investorlarla yanaşı, xarici investorların da iştirak etdiyi investisiya müsabiqələri vasitəsilə özəlləşdirmə nəticəsində ölkə iqtisadiyyatına təxminən 1,1 mlrd. ABŞ dolları məbləğində investisiya qoyulub".
R.Cəlilovun fikrincə, investorların müdafiəsi ilə bağlı əlavə tədbirlər görülür: "Hazırda mühüm məsələlərdən biri də regionlarda rəqabətqabiliyyətli müəssisələrin fəaliyyətinin yenidən qurulması, istehsal potensialının artırılması, büdcə yükünün azaldılmasıdır. Komitə intensiv olaraq açıq və şəffaf hərraclar keçirir. Azərbaycanda həyata keçirilən özəlləşmə prosesinin yeni mərhələsi xarici investorlar üçün kifayət dərəcədə maraqlıdır".
Konfransda müxtəlif dövlət qurumlarının rəsmiləri ölkədəki iqtisadi mühit, qeyri-neft sektorunun inkişaf perspektivləri, vergi və gömrük siyasəti, strateji özəlləşdirmə və investorlar üçün bu kimi digər məsələlərlə bağlı çıxış edib. Ölkəyə investisiyaların cəlb edilməsi şərtləri, investorların maraqlarının təmin olunması, sərmayə yatırımı üçün münbit sahələr, investisiyadan sonrakı yenidənqurma və profil üzrə fəaliyyət və digər məsələlərə aydınlıq gətirilib.
Bütövlükdə, investorların müdafiəsi ilə bağlı görülən əlavə tədbirlərin mahiyyəti nədən ibarətdir? Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun fikrincə, xarici investorların ölkəyə cəlbinə ehtiyac var: "Bunun üçün həm yerli, həm də xarici investorlar üçün hərtərəfli iqtisadi mühit yaradılmalıdır. Necə ki, 90-cı illərdə investorların Azərbaycana axını oldu. O dövrdə də mərhələli şəkildə özəlləşdirmə həyata keçirildi. Həmin özəlləşdirmədən sonra investorlar ölkəyə sərmayə qoyuluşu həyata keçirməyə başladılar. Düzdür, o zaman bu əsasən neft-qaz sektoruna oldu, amma dolayı da olsa, iqtisadiyyatın digər sahələrinə müsbət təsir göstərdi. O üzdən, təklif edərdik ki, qeyri-neft sektoruna investisiya cəlbi daha da stimullaşdırılsın, əsasən də kənd təsərrüfatı subyektlərinə. Qonşu ölkələrdən - Türkiyə, Rusiyadan investisiya cəlbinə çalışmaq lazımdır. Onlar üçün daha əlverişli şərait yaradılmalıdır ki, sərmayə qoymaqda maraqlı olsunlar. Həmçinin, Avropa ölkələrindən investisiya cəlb edilməlidir. Üzümçülüyün, çayçılığın inkişafına xüsusi önəm verilməlidir. Ona görə ki, bu sahələr gəlir gətirən sahələrdir və əmək tutumludur". Vidadi ORDAHALLI
