Ramil Osmanlı: "Burada söhbət 2013-cü ilə qədər çıxarışı olan fərdi yaşayış evlərindən gedir"
Azərbaycanda daşınmaz əmlakın sənədləşdirilməsi və dövlət qeydiyyatına alınması istiqamətində növbəti mühüm addım atılıb. Prezident İlham Əliyev "Daşınmaz əmlakın dövlət reyestri haqqında" Qanuna dəyişiklikləri təsdiqləyib. Dəyişikliklərə görə, indiyədək tikilmiş fərdi evlərin sənədləşdirilməsi daha da sadələşəcək.
Söhbət adıçəkilən qanunun 8.0.9.1-ci maddəsinə nəzərdə tutulan dəyişiklikdən gedir. Bu maddə Şəhərsalma və Tikinti Məcəlləsi qüvvəyə minənədək (2013-cü il yanvarın 1-dək) tikilmiş, hündürlüyü 12 metrədək olan yaşayış evlərinin qeydiyyatına aiddir.
İndiyədək həmin maddəyə əsasən, 2013-cü ilə qədər tikilmiş fərdi evlərin dövlət reyestrində qeydiyyata alınması üçün bir neçə sənəd tələb olunurdu. Bunlar torpaq sahəsi üzərində mülkiyyət, icarə və ya istifadə hüququnu təsdiq edən sənəd, evin icra hakimiyyəti orqanı ilə razılaşdırılmış layihəsi və ya yaşayış evinin istismara qəbul aktı idi. İndi isə həmin maddə dəyişdirilərək iki yerə ayrılıb. Dəyişikliyə əsasən, 2013-cü ilədək inşa edilmiş fərdi evlərin qeydiyyatı daha da sadələşəcək. Belə ki, adı çəkilən maddəyə əlavə edilən 8.0.9.1.2-ci maddəsinə görə, 2013-cü il yanvarın 1-dək inşa edilən evlərin qeydiyyatı üçün yalnız həmin evin yerləşdiyi torpaq sahəsi üzərində mülkiyyət hüququnu təsdiq edən sənədin (torpaqla bağlı "çıxarış"ın) olması kifayətdir. Başqa sözlə, çıxarışı olan torpaqda 2013-cü ilədək tikilmiş fərdi evlər heç bir əlavə şərt sürülmədən dövlət qeydiyyatına alınacaq. Bunun üçün yeganə tələb torpağın tikinti təyinatlı olmasıdır. Söhbət yaşayış evinin tikintisi üçün nəzərdə tutulmuş xüsusi mülkiyyətdə olan torpaq sahəsində yerləşən, hündürlüyü 12 metrədək olan yaşayış evlərindən gedir.
Maraqlıdır, sözügedən yeniliyi ekspertlər necə dəyərləndirir?
Məsələyə münasibət bildirən əmlak məsələləri üzrə ekspert Ramil Osmanlının sözlərinə görə, "Daşınmaz əmlakın dövlət reyestri haqqında" Qanuna edilən dəyişikliklər ölkədə minlərlə evin sənədləşməsinə gətirib çıxaracaq: "Burada söhbət 2013-cü ilə qədər çıxarışı olan fərdi yaşayış evlərindən gedir. Bu o deməkdir ki, Bakıda, Abşeronda və digər regionlarda yerləşən minlərlə ev sənədləşdiriləcək. Yəni fərdi yaşayış evləri bu şəkildə qeydiyyata alınacaq. Fərdi evlərin qeydiyyatının belə sadələşdirilməsi və sənədləşdirilmənin həyata keçirilməsi həmin evlərin rəsmi əmlak dövriyyəsinə cəlb edilməsinə imkan yaradacaq. Nəticədə həmin evlərlə rəsmi əməliyyatlar aparmaq - alıb-satmaq, bağışlamaq, müxtəlif məqsədlərlə girov qoymaq və s. mümkün olacaq. Əvvəllər evin sənədləşdirilməsi üçün müxtəlif sənədlər tələb olunurdusa, artıq bir çıxarış kifayət edəcək. Çıxarışı olan torpaqların üzərində yerləşən fərdi yaşayış evlərini rahat şəkildə özəlləşdirmək mümkün olacaq. Müvafiq icra hakimiyyətinə - Daşınmaz Əmlakın Dövlət Reyestri Xidmətinə həmin evin eskiz layihəsi və torpağın sənədi əlavə olunmaqla müraciət olunacaq. Ondan sonra qeydiyyat həyata keçiriləcək".
Vidadi ORDAHALLI
