Qalib Toğrul: "Birinci növbədə banklar özləri bu işə məsuliyyətli yanaşmalıdır"
Azərbaycanda perspektivdə borc-məsləhət mərkəzləri yaradıla bilər. Bu barədə Beynəlxalq Maliyyə Korporasiyasının (İFC) Azərbaycan üzrə direktoru Aliyə Əzimova bildirib. O bununla bağlı açıqlamasında bir sıra məqamlara toxunub: "Borc-məsləhət mərkəzlərinin yaradılması sahəsində İFC böyük təcrübəyə malikdir. Bu sahədə Azərbaycanda potensial çoxdur. Belə mərkəzlərin yaradılması həddən artıq borclanmanın qarşısını almaqda mühüm rol oynaya bilər. Borclar üzrə məsləhətləşmələr mexanizminin yaradılması önəmlidir".
A.Əzimova onu da bildirib ki, hazırda Azərbaycan iqtisadiyyatı təzyiq altındadır. Ticarət sahəsində tarazlığın pozulması maliyyə sektoruna da mənfi təsir göstərib. Onun sözlərinə görə, gələcəkdə Azərbaycanda bir sıra layihələr, o cümlədən fermerlərə biznesin idarə edilməsi üzrə layihənin həyata keçirilməsi də mümkündür.
Məlumat üçün qeyd edək ki, Azərbaycan İFC ilə 1995-ci ildən əməkdaşlıq edir.
Bütövlükdə, belə mərkəzlərin rolu nədən ibarətdir? Sözügedən məsələyə aydınlıq gətirən iqtisadçı-ekspert Qalib Toğrul hesab edir ki, borc-məsləhət mərkəzlərinin yaradılması bank sektorunda böyük rol oynaya bilər: "Bu məsələ ilə bağlı çox vacib amillər var ki, onlar nəzərə alınmalıdır. Təbii ki, borc-məsləhət mərkəzlərinin yaradılması borclanma ilə bağlı müəyyən qərarların qəbuluna kömək edə bilər. Amma ümumilikdə götürəndə banklar özləri bu məsələdə daha ehtiyatlı olmalıdır. Birinci növbədə banklar özləri bu işə məsuliyyətli yanaşmalıdır. Onlar kimlərə borc vəsaitin verilməsini ciddi götür-qoy etməlidir.
2008-ci ilin qlobal maliyyə böhranı da məhz Amerikadan başladı. Bu böhran da bankların məsuliyyətsiz şəkildə borc verməsi ilə bağlı oldu. Baxmayaraq ki, bank sektoru real bir sektor deyil, bank sektoru real sektorun inkişafını təşkil edəndə orada böyük sarsıntılar yaratmaq olur. Lap dəqiq desək, iqtisadiyyatın qan damarı kimi bir şeydir. Ona görə də belə mərkəzlərin yaradılması təqdirəlayiq olardı".
Vidadi ORDAHALLI
