İlqar Hüseynli: "Hesab edirəm ki, bu yöndə görülən işləri daha da təkmilləşdirmək lazımdır"
Xəbər verildiyi kimi, Azərbaycanda yoxlama zamanı dövlət orqanlarına təhrif olunmuş, yanlış məlumat verən sahibkarlar cərimələnəcək. Bu, Azərbaycan Prezidenti İlham Əliyevin 23 noyabr 2016-cı il tarixli Sərəncamı ilə qüvvəyə minən İnzibati Xətalar Məcəlləsinə dəyişiklikdə əksini tapıb.
Dəyişikliyə əsasən, qanun əsasında sahibkarlıq sahəsində yoxlama aparmaq səlahiyyəti verilmiş dövlət orqanına yoxlama zamanı təhrif olunmuş, yanlış məlumat verən vəzifəli şəxslər min manatdan min beş yüz manatadək məbləğdə cərimə ediləcək.
O da məlumdur ki, neft gəlirlərinin aşağı düşməsi ilə əlaqədar ölkədə bir sıra ciddi islahatlar aparılır. Belə ki, sahibkarların yoxlanılması halları 2 il müddətinə dayandırılıb. Həmçinin, lisenziyaların sayı azaldılıb. Eyni zamanda, İ.Əliyev tərəfindən imzalanmış Fərmanla lisenziya verilməsi qaydalarının sadələşdirilməsi və şəffaflıq, sahibkarlıq fəaliyyəti ilə bağlı bütün lisenziyaların "ASAN xidmət" mərkəzlərində verilməsi təmin olunub.
Bütün bunların fonunda, kimlərsə bu güzəştlərdən sui-istifadə etməməlidir.
Sözügedən məsələni dəyərləndirən ekspert İlqar Hüseynlinin fikrincə, məlum dəyişiklikdən sonra dövlət orqanlarına təhrif olunmuş, yanlış məlumatvermə halları azalacaq: "Çünki bəzi yoxlamaların dayandırılması müəyyən sui-istifadə hallarına şərait yaradır. Bəzi sahibkarlar bundan öz maraqları üçün istifadə edir. Hansısa formada vergidən yayınmağa çalışırlar, gəlirləri gizlədirlər. Bu da, istər-istəməz, müəyyən neqativ halların yaranmasına şərait yaradır. Ancaq məlum qərardan sonra dövlət orqanlarını aldatmaq, vergini, dövriyyəni gizlətmək cəhdləri azala bilər. Hesab edirəm ki, bu yöndə görülən işləri daha da təkmilləşdirmək lazımdır. Elə etmək lazımdır ki, bundan sahibkarlar çox da əziyyət çəkməsin. Neft gəlirlərinin azalması fonunda ölkədə sahibkarlığın inkişafı vacibdir". Vidadi ORDAHALLI
