"Hüquqi müstəvidə çəkişmə başlasa, əminəm ki, Yunanıstan həm uduzacaq, həm də cərimələnəcək"
Yunanıstan hökumətinin bu ölkənin qazpaylayıcı şəbəkəsinin operatoru olan DESFA-nın özəlləşdirilməsi istiqamətində qeyri-müəyyən siyasət yürütməsi, prosesdə süründürməçiliyə yol verməsi daha çox rəsmi Afinanın öz əleyhinə işləməkdədir. Çünki bu hal ölkəni həm DESFA-nın özəlləşdirilməsindən, həm də bundan sonra Azərbaycan tərəfindən Yunanıstana qoyulacaq sərmayələrdən məhrum edir.
Artıq yunan müxalifəti bununla bağlı hökumətə iradlarını çatdırıb və prosesdə süründürməçiliyə son qoyulmasını istəyib. Yunanıstan-Azərbaycan Ticarət Palatası isə bildirir ki, DESFA şirkətinin özəlləşdirilməsi üzrə tenderdə qalib olmuş Azərbaycan Dövlət Neft Şirkəti (SOCAR) ilə razılaşma ləğv olunarsa, bu, ölkənin biznes maraqlarına ziyan vuracaq.
Amma yunan hökuməti, görünür, məsələnin həllini tezləşdirmək niyyətində deyil. Azərbaycan isə belə vəziyyətdə müqaviləyə xitam verilməsini belə istisna etmir. Aydındır ki, bunun məsuliyyəti də məhz yunan tərəfinin üzərinə düşür. SOCAR prezidenti Rövnəq Abdullayev də bu günlərdə bildirib ki, Yunanıstan hökuməti DESFA-nın özəlləşdirilməsi ilə bağlı keçirilən tender proseduruna zidd hərəkət edib: "Əvvəlcə danışılan qaydalar pozulub. Biz də Yunanıstan hökumətindən bunun əsaslandırılmasını gözləyirik. Dəyişilən qaydaya əsasən, DESFA-nın qiyməti iki dəfə aşağı enir. Əgər obyektin gəlirliliyi aşağı salınırsa, deməli, onun qiyməti də aşağı enməlidir".
Artıq Azərbaycan tərəfinin açıqlamalarından görünür ki, vəziyyətin bu cür davam edəcəyi təqdirdə tərəflər arasındakı razılaşma pozula bilər. Belə olacağı halda, Yunanıstanı nə gözləyə bilər?
Ekspert Ənvər Fərəcovun sözlərinə görə, bütün hallarda, uduzan Yunanıstan olacaq: "2013-cü ildə SOCAR DESFA-nın özəlləşdirilməsi ilə bağlı tenderi udub. Qiyməti 325 milyon avro idi. Lakin o zaman baş nazir Azərbaycan Prezidentinə müraciət edərək bildirdi ki, ölkənin iqtisadi durumu çətindir və DESFA-nın bazar dəyəri 400 milyon avroyadək artırılıb. Biz tərəfdaşlarımızın təklifinə müsbət reaksiya verdik, onlarla həmrəyliyimizi göstərdik. Faktiki olaraq SOCAR bazar dəyərindən 20 % artıq qiymətə razılaşıb. Halbuki, DESFA-nın özəlləşdirilməsinə heç bir Avropa şirkəti maraq göstərməyib. İndi vəziyyətin bir qədər stabilləşdiyini görən Yunanıstan başqa şərtlər irəli sürür. Ancaq Azərbaycan tərəfi düzgünlüyün ortaya çıxmasında maraqlıdır. Hesab etmirəm ki, Azərbaycan bu layihədən asanlıqla əl çəkəcək. Belə hallarla bağlı nüfuzlu məhkəmələrə müraciət edilir. Biz hələ ki, bu hüququ əlimizdə saxlayırıq. Hüquqi müstəvidə çəkişmə başlasa, əminəm ki, Yunanıstan həm uduzacaq, həm də cərimələnəcək. Üstəlik də ölkə fırıldaqçı imic qazanacaq".
Məhəmmədəli QƏRİBLİ
