"Keyfiyyətin artırılması istiqamətində addımların atılmasına ehtiyac var"
Fövqəladə Hallar Nazirliyinin Dövlət Taxıl Fondu üçün yüksək keyfiyyətli buğdanın tədarükünün vaxtı bu ilin 1 noyabr tarixinədək uzadılıb. Həmçinin, yerli buğda istehsalçılarından tədarük olunan keyfiyyətli buğdanın qiyməti bir ton üçün 250 manatdan 270 manata qaldırılıb.
Bu barədə Fövqəladə Hallar Nazirliyinin (FHN) mətbuat xidməti məlumat yayıb. Nazirliyin Dövlət Material Ehtiyatları Agentliyi 21 iyun 2016-cı il tarixində Dövlət Taxıl Fondu üçün 2016-cı ildə ölkədə istehsal olunmuş yüksək keyfiyyətli buğdanın tədarükünü elan etmişdi. Son qərardan sonra həm vaxt uzadılıb, həm də qiymət artırılıb.
Məlumat üçün onu da qeyd edək ki, Azərbaycanda istehsal olunan buğda siniflərə bölünmür. Yəni onun keyfiyyəti ilə bağlı bəzi problemlər var. Həmin problemlər aradan qalxsa, o zaman yerli taxılın tədarükündə ciddi irəliləyiş olar. Onu da əlavə edək ki, Azərbaycan 2014-cü ildə 1 milyon 500 min ton, 2015-ci ildə 1 milyon 358 min ton, 2016-cı ildə 788 min ton çox buğda idxal edib. İdxalı aradan qaldırmaq üçün yerli buğdanın keyfiyyəti artırılmalıdır.
Bütün bu deyilənlərin fonunda ekspertlər yerli buğda istehsalçılarından tədarük olunan keyfiyyətli buğdanın qiymətinin bir ton üçün 270 manat müəyyən olunmasını necə dəyərləndirir?
Məsələyə münasibət bildirən iqtisadçı-ekspert Vüqar Bayramovun sözlərinə görə, qiymətlərin artırılması vacib idi və bu davam etdirilməlidir: "Çünki indiki məqamda qiymətlərin artırılması fermer təsərrüfatlarının buğda istehsalını stimullaşdıra bilər. Fermerə istehsal etdiyi buğdaya görə verilən qiymət yüksək olmalıdır ki, fermer təsərrüfatı buğda istehsalında maraqlı olsun. Əvvəla daxili mənbələr hesabına taxıla olan tələbin ödənilməsi və bu istiqamətdə addımların atılmasına ehtiyac var. Bir tərəfdən bu, aqrar sektorun inkişafı deməkdir. Qiymət yüksək olacaqsa, fermerlər artıq məhsul istehsalında maraqlı olacaq. Digər üstünlüyü odur ki, bu, idxaldan asılılığın aradan qaldırılması baxımından vacibdir. İndiki halda, taxılla bağlı idxaldan asılılığın aradan qaldırılması realdır. Sadəcə, bu zaman tələb edəcək. Digər tərəfdən, Azərbaycanda istehsal edilən buğdanın böyük hissəsi taxıl üçün yararlı deyil və onların bir qismi daha çox dən kimi aqrar sektorda istifadə olunur. Həm də məqsəd ondan ibarət olmalıdır ki, keyfiyyəti artırmaq mümkün olsun. Ona görə də keyfiyyətin artırılması istiqamətində addımların atılmasına ehtiyac var. İl ərzində təxminən 2,7 milyon ton taxıl istehsal edirik. Amma təəssüf ki, onun böyük bir hissəsi istehsal üçün, yəni çörək bişirmək üçün yararlı deyil. Bu taxılın da 1,7 milyon tonu buğdadır. Amma buğda idxalı yenə yüksək olaraq qalır. Buğda, xüsusən çörək bişirmədə istifadə edilən buğda idxalı yüksək olduğu üçün nəticədə bu, idxaldan asılılığın qorunub saxlanmasına gətirib çıxarır".
Vidadi ORDAHALLI
