"Bu günə qədər kənd təsərrüfatı sahəsində bir sıra uğurlu islahatlar aparılıb, lazımi tədbirlər görülüb"
"Biz ərzaq məhsulları ilə bağlı idxaldan asılılığımızı tam aradan qaldırmalıyıq". Bunu Prezident İlham Əliyev "Yalama" Südlük-Maldarlıq üzrə Damazlıq Dövlət Kənd Təsərrüfatı İstehsalı Müəssisəsinin bazasında yaradılmış Yalama Aqroparkının açılışından sonra rayon ictimaiyyəti nümayəndələri ilə görüşündə söyləyib.
Dövlət başçısı iqtisadi inkişafla bağlı prioritetlərin bəlli olduğunu qeyd edib: "Qeyri-neft sektoru inkişaf edir və bu gün ölkəmizin iqtisadiyyatının təxminən 70 faizini təşkil edir. Bu da çox böyük nailiyyətdir. Bu o deməkdir ki, biz neft amilindən asılılığımızı azaldırıq və getdikcə ümumdaxili məhsulumuzda qeyri-neft sektorunun çəkisi artacaq. Bu müsbət dinamikadır. Bununla bərabər, biz ixracda da eyni mənzərəni görməliyik. Hələ ki, ixrac məhsullarının arasında qeyri-neft sektorunun məhsulları azlıq təşkil edir. Ona görə burada həm qeyri-neft sektorunun inkişafı təmin ediləcək, həm də biz daxili tələbatı tam ödəyəcəyik. Beləliklə, ərzaq təhlükəsizliyi təmin olunacaq və biz gələcəkdə ərzaq məhsulları ilə bağlı idxaldan asılılığımızı tam aradan qaldırmalıyıq".
Prezident qeyd edib ki, Azərbaycanın bütün bölgələri inkişaf edir. Çox böyük infrastruktur və sosial layihələr icra edilir - iqtisadi layihələr, kənd təsərrüfatı layihələri: "Biz bax belə inkişaf etməliyik. Budur bizim yolumuz və bu yol artıq özünü təsdiqləyib. Çünki nəinki regionda, dünya miqyasında bu gün ölkəmizin təcrübəsi öyrənilir. Təkcə iqtisadi sahədə deyil, bütün sahələrdə, o cümlədən dinlərarası, millətlərarası münasibətlərin sağlam zəmində qurulması məsələləri də həmişə diqqət mərkəzindədir".
Ərzaq idxalının minimuma endirilməsi olduqca vacibdir. Bu imkan verəcək ki, valyuta gəlirlərimizin böyük hissəsi bizə qalsın. Sözügedən məsələni dəyərləndirən iqtisadçı, millət vəkili Vahid Əhmədovun fikrincə, ölkədə qeyri-neft sektorunun inkişafına önəm verilməlidir: "Ona görə də qeyri-neft sektorunun, xüsusən də kənd təsərrüfatının, sənayenin, turizmin, insan kapitalının inkişaf etdirilməsi bizim üçün ən mühüm məsələlərdən biridir. Bu günə qədər kənd təsərrüfatı sahəsində bir sıra uğurlu islahatlar aparılıb, lazımi tədbirlər görülüb. Bununla bərabər, bu sahədə bəzi problemlər də özünü göstərməkdədir. Onların həlli üçün də müəyyən vaxt lazımdır. Əsas məsələ idxal-ixrac əməliyyatları ilə bağlı göstəricilərdir. Bizim ixracımızın təxminən 90 faizini neft-qaz məhsulları təşkil edir. Bunun da strukturuna baxmaq gərəkdir. Azərbaycanda idxal 50 faizdən çoxdur. Ölkə daxilində harada nəyi istehsal etməyin mümkünlüyünü qısa zamanda araşdırmaq, onları həyata keçirmək gərəkdir. Bu səbəbdən dövlət başçısı da idxal-ixrac məsələlərinə çox ciddi yanaşmağı tapşırıb. Xüsusən də sənaye sahəsində bizim imkanlarımız genişdir. Misal üçün, Azərbaycana idxal olunan bir sıra sənaye məhsullarının əksəriyyətini ölkəmizdə istehsal etmək mümkündür. Kənd təsərrüfatının emal sənayesinə də diqqət yetirmək gərəkdir".
Vidadi ORDAHALLI
