"Ola bilməz ki, səfir bu barədə ətraflı bilgiyə malik olmasın"
Yunanıstanın DESFA şirkətilə Azərbaycana məxsus olan SOCAR arasında yaranan anlaşılmazlığa artıq diplomatik müstəvidə də münasibət bildirilir. Qeyd edək ki, məsələ ilə bağlı həm Yunanıstanın Azərbaycandakı səfirinin, həm də ölkəmizin Afinadakı elçisinin münasibəti açıqlanıb.
Yunanıstanın Azərbaycandakı səfiri Dmitros Tsuqans yerli jurnalistlərə müsahibəsində bu məsələ ilə bağlı konkret mövqe bildirməyib. Səfir bunu mövzu barəsində geniş informasiyaya malik olmaması ilə əsaslandırıb: "Mən DESFA ətrafındakı vəziyyətlə bağlı sizə geniş açıqlama vermək istərdim. Təəssüflər olsun ki, bu barədə əlimdə yetərincə məlumat olmadığı üçün bunu edə bilmirəm. Mən də sizin kimi, bu barədə mətbuatdan tanış oluram. Vəziyyəti dramatikləşdirmək istəməzdim. Hesab etmirəm ki, konfliktli situasiya yaranıb. Söhbət layihənin gecikməsinə səbəb olan standart prosedurlardan gedir. Əminəm ki, bu razılaşma tez bir zamanda həm Azərbaycan, həm də Yunanıstan üçün sərfəli olan şərtlər daxilində həllini tapacaq".
Qeyd edək ki, Azərbaycanın Afinadakı səfiri Rəhman Mustafayev də mövzu ilə bağlı açıqlama verib. O, Yunanıstanın energetika naziri Panos Skurletisin "Azərbaycan tərəfi iqtisadiyyatdakı durğunluq səbəbindən DESFA-nın özəlləşdirilməsindən imtina etmək istəyir" açıqlamasına münasibət bildirib. Səfir qeyd edib ki, bu cür bəyanatlar qəbulolunmazdır və təəccüb doğurur: "Bu açıqlama bizdə təəccüb doğurdu. Bu bəyanat qəbulolunmazdır. Nazir Azərbaycana qarşı hörmətsizlik etməməli idi. İki dost ölkənin rəsmiləri özünü bu cür aparmamalıdır. Bəyanatın mahiyyətinə gəldikdə, səslənən fikirlər həqiqəti əks etdirmir. Azərbaycan, o cümlədən SOCAR bir çox ölkələrə, məsələn, Rusiya, Türkiyə, İran, Gürcüstan, İsveçrə, Malta, Bolqarıstan, Çernoqoriya, Serbiya və sair ölkələrə iri investisiyalar yatırıb və etibarlı tərəfdaş olduğunu sübut edib".
Yunanıstanın Azərbaycandakı səfirinin DESFA ilə bağlı verdiyi açıqlamanı necə şərh etmək olar?
İqtisadçı Günel Fərhadqızı qəzetimizə açıqlamasında bildirdi ki, Yunanıstan hökuməti bu məsələdə açıq cığallıq edir: "Maraqlıdır ki, bu oyunbazlığın kökündə duran məsələni başqa istiqamətə yayındırmaq istəyir və günahı Azərbaycanın üzərinə atır. Yunanıstanın bu hərəkəti Azərbaycanın haqlı narazılığına səbəb olub və buna Rövnəq Abdullayev səviyyəsində etiraz edilib. SOCAR prezidenti haqlı olaraq bildirib ki, əvvəlcə danışılan qaydalar pozulub. Dəyişilən qaydaya əsasən, DESFA-nın qiyməti iki dəfə aşağı enir. Əgər obyektin gəlirliliyi aşağı salınırsa, deməli, onun qiyməti də aşağı enməlidir. Maraqlıdır ki, bu bəyanatın ardınca yunan rəsmiləri Azərbaycan iqtisadiyyatında durğunluğu əsas gətirməklə vəziyyətdən çıxış yolu axtarırlar.
Bu cür məsələlərə inzibati müdaxilə xarici investisiya axınının qarşısını ala bilər. Əgər kimsə hansısa mexanizmi dəyişmək istəyirsə, biz etiraz etmirik. Lakin bu sivil qaydalar çərçivəsində baş verməlidir. Bu addım isə SOCAR-la razılaşdırılmadan atılırsa, bunun adı cığallıqdır. Yunanıstanın ölkəmizdəki səfiri məsələyə diplomatik yanaşaraq sualdan yayınıb. Ola bilməz ki, səfir bu barədə ətraflı bilgiyə malik olmasın. Səfir bu məsələni standart prosedurlarla izah edir. Ancaq belə deyil. DESFA məqsədli şəkildə razılaşmadan yayınır. Bunun da kökündə daha çox mənfəət əldə etmək marağı durur. Yunanıstanın rəsmi şəxslərinin də bu məsələyə münasibət bildirməsi və birmənalı olaraq DESFA-nın mövqeyini müdafiə etməsi onu deməyə əsas verir ki, səfir mövzudan xəbərsiz ola bilməz. Hesab edirəm ki, o məqsədli şəkildə sualdan yayınıb.
Yunan nazirin fikirlərinə cavab olaraq bildirmək istəyirəm ki, SOCAR heç bir ölkədə etibarını itirməyib. Əksinə, onun xaricə yatırdığı sərmayə davamlı xarakter alıb. Bu kontekstdən yanaşsaq, onda Yunanıstan öz iqtisadiyyatındakı acınacaqlı vəziyyətdən danışmalıdır. Ölkənin nazirləri bir-bir ölkələrin qapısını döyüb pul istəyirdilər. Hətta Avropa Birliyinin bəzi ölkələri Yunanıstanın əlindən qurumu tərk edəcəyi ilə bağlı bəyanat da vermişdi".
Məhəmmədəli QƏRİBLİ
