"Azərbaycanın əsas məqsədi şəffaf, açıq investisiya mühitinə malik olmaqla daha çox xarici sərmayənin cəlbini həyata keçirməkdir"
Dünya Bankı (DB) və Beynəlxalq Maliyyə Korporasiyası (IFC) özəl sektorun inkişafında və ona investisiyaların təşviqində Azərbaycanı dəstəkləməyə hazırdır. Bunu IFC-nın Cənubi Qafqaz üzrə regional meneceri Yan van Bilsen Bakıda investisiya mühiti, investisiyaların təşviqi və qorunmasına həsr olunmuş seminarda deyib.
Onun sözlərinə görə, hazırda Azərbaycan üçün təkcə birbaşa xarici investisiyaları cəlb etmək deyil, həm də daxili kapital qoyuluşlarını özəl sektora təşviq etmək vacibdir: "Hazırda əsas vəzifələrdən biri daxili investisiyaların axını, xarici və daxili investorlar üçün eyni şəraitin yaradılması məqsədilə mümkün maneələrin aradan qaldırılmasıdır. Bu, ölkəyə iqtisadiyyatını şaxələndirməyə, iş yerlərinin sayını artırmağa və ölkənin fiskal balansını təkmilləşdirməyə imkan verəcək".
Mövzu ilə bağlı iqtisadçı-ekspert Vüqar Bayramova müraciət etdik. O, "Bakı-Xəbər"ə açıqlamasında qeyd etdi ki, Azərbaycan üçün xarici investisiyanın cəlb olunması prioritet məsələlərdən biridir: "Ölkə başçısı İlham Əliyevin də dediyi kimi, postneft dövründə də Azərbaycanın əsas məqsədi xarici investisiyanın cəlb olunmasıdır. Bu gün hazırlanan strateji sənədlərdə də xaricdən investisiyanın daha uyğun şərtlərlə cəlb olunması və onun qəbulu ilə bağlı şəraitin formalaşdırılması əsas vəzifələrdən biri olaraq müəyyənləşdirilib. Uyğun şərait dedikdə investisiya mühitinin yaxşılaşdırılması nəzərdə tutulur. Daha yaxşı investisiya mühitinə malik olmaqdan söhbət gedir. Azərbaycanda daha yaxşı investisiya mühiti formalaşarsa, xarici sərmayənin ölkəyə gəlməsinə şərait yaradacaq. Prezident İ.Əliyevin imzaladığı son sənədlərdə də məqsəd investisiya mühitinin yaxşılaşdırılması istiqamətindədir".
İqtisadçının sözlərinə görə, Dünya Bankının Bizneslə məşğul olmaq hesabatında Azərbaycanın investisiya mühitinin yaxşılaşması haqqında məlumat veriləcək: "Nəzərə almaq lazımdır ki, iş adamları getdiyi ölkələrin vəziyyətini öyrənmək üçün Dünya Bankının Bizneslə məşğul olmaq hesabatına nəzər salır. İş adamları həmin hesabat əsasında öz investisiyasını həyata keçirir".
V.Bayramov bildirdi ki, Azərbaycanın əsas məqsədi şəffaf, açıq investisiya mühitinə malik olmaqla daha çox xarici sərmayənin cəlbini həyata keçirməkdir: "Artıq bu istiqamətdə addımlar atılır. Bizim məlumatlarımız da göstərir ki, gələn aydan etibarən Azərbaycanda kifayət qədər strateji sənədlərin qəbulu və icrası həyata keçiriləcək. Bu da Dünya Bankı ekspertlərinin qeyd etdiyi xarici və daxili investisiyanın cəlb olunması baxımından fəaliyyətlərin həyata keçirilməsi anlamına gəlir. Qiymətləndirmələr göstərir ki, növbəti aydan etibarən Azərbaycanda investisiya mühitinin daha da inkişafı istiqamətində işlər görüləcək. Real olaraq 2016-cı ilin sonuna doğru daxili və xarici investisiyanı böyük həcmdə cəlb edə biləcək investisiya mühitinə sahib ola biləcəyik".
Günel CƏLİLOVA
