"Bu cür halların qarşısını almaq məqsədilə onların cəzalandırılması düzgün addımdır"
Xəbər verildiyi kimi, sahibkarlara yeni cərimə tətbiq ediləcək. Bununla bağlı İnzibati Xətalar Məcəlləsinin 602.4 maddəsinə dəyişiklik təklif olunur. Belə ki, Azərbaycanda sahibkar yoxlama prosesində yoxlamaya aid sənədləri yoxlayıcıya verməməsinə, təhrif olunmuş, yanlış məlumatı verməsinə görə cərimələnəcək.
Dəyişiklik layihəsinə əsasən, sahibkar tərəfindən yoxlama prosesində yoxlamaya aid sənədləri yoxlayıcıya təhrif olunmuş halda verməsinə, yanlış məlumatın verilməsinə görə vəzifəli şəxslər 1000 manatdan 1500 manatadək cərimə edilir.
Qeyd edək ki, layihə Milli Məclisin plenar iclasına tövsiyə olunub.
Təklif olunan məsələ barəsində fikir bildirən iqtisadçı-ekspert Oqtay Haqverdiyev qəzetimizə açıqlamasında qeyd etdi ki, qanunu pozan sahibkarların cərimələnməsi düzgün haldır: "Bu gün bəzi sahibkarlar vergidən yayınmaq məqsədilə gəlirin az olduğuna dair yanlış sənədlər hazırlatdırıb təqdim edir. Təhrif olunmuş rəqəmlər əsasında həmin sahibkar az miqdarda vergi ödəmiş olur. Bu cür halların qarşısını almaq məqsədilə onların cəzalandırılması düzgün addımdır".
Həmsöhbətimiz hesab edir, sahibkarların vergidən yayınmasının qarşısını almaq məqsədilə onlar qanun çərçivəsində cəzalandırılmalıdır: "Bildirilir ki, yoxlama prosesində yanlış sənəd təqdim edən və ya yanlış məlumat verməklə yoxlayıcını aldadan şəxs 1000-1500 manat dəyərində cərimələnəcək. Sahibkarlar üçün 1000-1500 manat pul böyük məbləğ deyil. Yaxşı olar ki, onların öz işinə məsuliyyətli yanaşması üçün daha sərt cəza metodu tətbiq olunsun. Təbii ki, söhbət iri sahibkarlardan gedir".
Günel CƏLİLOVA
