"Yaxın bir-iki ildə qeyri-neft sektoru maliyyə bazarında daha çox çəkiyə malik olacaq"
Bu ilin yanvar-avqust ayları ərzində Bakı Fond Birjasında (BFB) bütün alətlər üzrə keçirilən əqdlərin ümumi həcmi 2,942,895,811.59 manat təşkil edib. Ötən ilin müvafiq dövründə bu göstərici 7,341,295,511.74 manat (2,5 dəfə çox) olub.
Ancaq bu ilin 8 ayı ərzində dövlət qiymətli kağızlar bazarı 18,3 dəfə artaraq 19 156 674,15 manatdan 350 597 317,53 manata çatıb. Pay bazarı isə 5,6 dəfə azalaraq 148 003 802,15 manatdan 26 580 746,42 manata, borc alətləri bazarı 31,3 dəfə azalaraq 1 520 309 886,46 manatdan 48 632 634,68 manata enib. Göründüyü kimi, digər sahələrdən fərqli olaraq qiymətli kağızlar bazarında müəyyən artım, canlanma var.
O da məlumdur ki, inkişaf etmiş ölkələrdə qiymətli kağızlar bazarı iqtisadiyyatın idarə edilməsində, yeni layihələrin investisiyalaşdırılmasında, mütərəqqi istehsal texnologiyalarının tətbiqi zamanı maliyyə probleminin həllində əhəmiyyətli rol oynayır.
Ümumilikdə ekspertlər bu ilin 8 ayında qiymətli kağızlar bazarında artımı necə dəyərləndirir? Məsələyə münasibət bildirən ekspert Zakir Əhmədovun fikrincə, Azərbaycanda qiymətli kağızlar bazarının təşəkkülü və inkişafı müstəqillik dövründə olub: "Ancaq hələ ki, ölkənin qiymətli kağızlar bazarının vəziyyəti inkişaf etmiş ölkələrin səviyyəsində deyil. Bunun bir sıra səbəbləri var. Halbuki, müasir dünya iqtisadiyyatını bu sahəsiz təsəvvür etmək mümkün deyil. İnkişaf etmiş ölkələrdə birjalar iqtisadiyyatın "barometri" funksiyasını yerinə yetirir. Azərbaycanda belə vəziyyətin yaranma səbəbi odur ki, dünya iqtisadiyyatında son illər dalbadal baş verən böhranlar ölkədə yenicə intişar tapmaqda olan qiymətli kağızlar bazarına ciddi ziyan vurub. Xüsusilə neftin qiymətinin bir neçə ay ərzində kəskin düşməsi əməliyyatları azaldıb. Lakin böhranların baş verməsi qeyri-neft sektorunun inkişafına tələbatı artırıb. Yaxın bir-iki ildə qeyri-neft sektoru maliyyə bazarında daha çox çəkiyə malik olacaq. Bu da tezliklə qiymətli kağızlar bazarında müsbət dəyişikliklərin baş verəcəyinə inam yaradır. Bu ilin 8 ayında qeydə alınan artım bu sahədə müsbət tendensiyaların olmasından xəbər verir. Ümid edirəm ki, yaxın illərdə Azərbaycanın qiymətli kağızlar bazarında ciddi artım özünü göstərəcək". Vidadi ORDAHALLI
