"Biz qeyri-neft sektorunu da sürətlə inkişaf etdiririk"
Azərbaycan inkişaf edən sənayesi olan ölkələr kateqoriyasına daxil olub. Ölkəmiz orta həddən yuxarı gəlir səviyyəsi olan ölkələr sırasına daxildir (12 475-4 126 ABŞ dolları həddində). Bu barədə Birləşmiş Millətlər Təşkilatının 2016-cı il üçün sənaye inkişafı üzrə hesabatında (UNIDO) deyilir.
Hesabata əsasən, Azərbaycana qonşu olan Türkiyə və İran da orta həddən yuxarı gəlir səviyyəsi olan ölkələr kateqoriyasına daxil olub. Sənəddə qeyd olunur ki, Rusiya yüksək gəlir səviyyəsi olan ölkələr kateqoriyasında, Ermənistan və Gürcüstan isə orta həddən aşağı gəlir səviyyəsi olan ölkələr kateqoriyasında yer alıb (4 125-1 046 ABŞ dolları).
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev "Bakı-Xəbər"ə açıqlamasında qeyd etdi ki, son 10-12 il ərzində ölkə başçısı İlham Əliyevin siyasətinin məğzi Azərbaycanın aqrar-sənaye ölkəsi olması idi: "Biz buna nail olduq. Bu gün ölkəmizin adı beynəlxalq hesabatlarda öndə çəkilir. İlham Əliyevin iqtisadi siyasətinin nəticəsidir ki, Azərbaycan inkişaf edən sənaye ölkələri siyahısına daxil olub".
Həmsöhbətimiz qeyd etdi ki, tək ölkə daxilində deyil, eyni zamanda xaricdə də Azərbaycan sənaye sahəsini inkişaf etdirmək üçün sərmayələr qoyulur: "Türkiyə, Ukrayna, Gürcüstan, Ukrayna və digər Avropa ölkələrində sərmayələr qoyulub. Bütün bunlar onu göstərir ki, Azərbaycan sənaye ölkəsinə çevrilmək ərəfəsindədir. Bu hal beynəlxalq hesabatlarda, reytinq cədvəllərində öz əksini tapır".
Millət vəkilinin sözlərinə görə, Azərbaycan neft, neft- kimya, dağ emalı, tikinti-inşaat sektorunda və digər sənaye sahələrində inkişaf əldə edib: "Mən deyərdim ki, postsovet və hətta postsosialist məkanında özümüzə aid olan yeri tutmuşuq və həmin yeri qorumağa davam edirik. Açıqlanan statistik rəqəmlərdə qeyd olunur ki, son 10 il ərzində qeyri-neft sektorunun artımı ümumdaxili məhsulun artımından 2-2.5 dəfə artıq olub. Bu da onu göstərir ki, biz qeyri-neft sektorunu da sürətlə inkişaf etdiririk. Əfsuslar olsun ki, dünyada böhran başlayıb. Böhran nə bu il, nə də ötən il başlayıb. Xatırladım ki, böhran 2007-2008-ci ildən başlayıb. Böhran nəticəsində neftin dünya qiyməti təxminən 3.5-4 dəfə aşağı düşdü. Bu hal təbii ki, bizə təsir edib. O mənada təsir edib ki, biz neftdən gələn gəlirin bir çox hissəsini sənaye sahəsinə yatıraq".
R.Quliyevin sözlərinə görə, ölkə başçısı İ.Əliyevin göstərişi ilə kiçik və orta biznesin inkişafına yönəlik işlər görülür: "Bəllidir ki, inkişaf etmiş ölkələrin ümumdaxili məhsulunun 50-70 faizə qədəri kiçik və orta biznesin fəaliyyəti nəticəsində formalaşır. Almaniya, Fransa, İtaliya, Yaponiya, İspaniya kimi ölkələrdə də ümumdaxili məhsulun müəyyən hissəsi adıçəkilən sahənin hesabına formalaşır. Bizdə də bu istiqamətdə işlər görülür. Görülən işlərin müsbət nəticəsi artıq müşahidə olunur".
Millət vəkili bildirdi ki, BMT-nin 2016-cı il üçün sənaye inkişafı üzrə hesabatında Azərbaycanın inkişaf edən sənaye ölkələri sırasında yer alması faktlar əsasında tərtib olunub.
Günel CƏLİLOVA
