"Turistlərin əllərindəki valyutanı sərbəst şəkildə həm manata, həm də geri qayıdarkən dollar və ya avroya çevirməsinə şərait yaradılmalıdır"
Bəllidir ki, son günlər banklar dollar satışını dayandırıb. Dollar satışının dayandırılmasından tək yerli əhali deyil, eyni zamanda ölkəmizə istirahətə gələn turistlər də əziyyət çəkir. İstirahətini başa vurub geri qayıtmaq istəyən turistlər əllərində qalan manatı dollara çevirmək istəyir. Lakin turistlər əllərindəki manatı xarici valyutaya çevirə bilmir.
Təbii ki, belə bir halın yaşanması tək ölkə iqtisadiyyatına deyil, eyni zamanda turizm sahəsinə də təsir edir. Pulu çevirə bilməyən turist növbəti ildə istirahət üçün çətin ki, Azərbaycanı seçə.
Bu halın qarşısını almaq üçün nə kimi tədbirlər görmək lazımdır? Ən azından turistlərə əllərində olan valyutanı dollara çevirmək üçün köməklik göstərilə bilərmi? İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, turizmin inkişafı baxımından ölkəyə gələn turistlərin əllərindəki valyutanı sərbəst şəkildə həm manata, həm də geri qayıdarkən dollar və ya avroya çevirməsinə şərait yaradılmalıdır.
İqtisadçı problemin yaşanmaması üçün təklif edir ki, beynəlxalq hava limanlarında xüsusi valyuta mübadiləsi bankomatları yerləşdirilsin: "Turist ölkəni tərk edən zaman öz uçuş biletinin nömrəsini və pasport seriyasını daxil etməklə həmin bankomatdan istədiyi valyutanı əldə edə bilər. Mən sizə deyim ki, beynəlxalq təcrübədə də bu vasitədən istifadə olunur. Hətta turist minik kartını bankomatın oxuma hissəsinə yaxınlaşdırmaqla turist haqqında məlumat qeyd olunacaq. Bu halda da turist əlində olan vəsaiti istədiyi valyutaya dəyişə bilər. Minik kartının təhlükəsizliyini qorumaq üçün bankomat turist qeydiyyat bölməsini keçdikdən sonra yerləşdirilə bilər. Bu halda heç kim həmin kartdan istifadə edə bilməz".
İqtisadçının fikrincə, dollar qıtlığı müşahidə olunduğu dövrdə turistlər üçün ayrıca bankomatın olması zəruridir.
Həmsöhbətimiz onu da diqqətə çatdırdı ki, həm yerli, həm də xarici vətəndaşların rahatlığı üçün əllərində olan manatı dollar və ya avroya dəyişdirməsinə şərait yaradılmalıdır.
Günel CƏLİLOVA
