"Azərbaycan həm öz yüklərini dünya bazarına çıxarmaq imkanı qazanacaq, həm də tranzit ölkə kimi böyük mənfəət əldə edəcək"
Azərbaycan, Türkiyə və Türkmənistan Londondan Pekinədək nəqliyyat dəhlizinin yaradılması məqsədilə Aşqabad bəyannaməsini imzalayıb. "Report"un Türkiyənin "Anadolu" agentliyinə istinadən verdiyi məlumata görə, xəbəri Türkiyənin nəqliyyat, dənizçilik və kommunikasiya naziri Ahmet Arslan yayıb. Onun sözlərinə görə, sənəd Türkmənistanda üç ölkənin nəqliyyat nazirliklərinin nümayəndələrinin iştirakı ilə imzalanıb.
"Türkmənistanda mühüm görüşlərimiz oldu. Biz, həmçinin, Londondan Pekinə birbaşa və mütəmadi nəqliyyat dəhlizinin yaradılması üçün Türkiyə, Azərbaycan və Türkmənistanın nəqliyyat nazirlərinin birinci toplantısı zamanı bu sənədi rəsmiləşdirdik. Azərbaycan tərəfindən sənədi nəqliyyat nazirinin müavini Arif Əsgərov və Türkmənistanın avtomobil nəqliyyatı naziri Maksat Aydoqdıyev imzaladı", - deyə o bildirib.
Türkiyəli nazir, həmçinin, Bakı-Tiflis-Qars dəmir yolu layihəsi, Mərmərə və dəmir yolu xətti üzərində Yavuz Sultan Selim körpüsü, üçüncü hava limanı kimi layihələrin beynəlxalq planlarla birlikdə, beynəlxalq nəqliyyat hədəflərini bütövləşdirməyi planlaşdırdıqlarını vurğulayıb: "Türkmənistanda imzaladığımız Aşqabad bəyannaməsi bu hədəfimizə bizi bir addım yaxınlaşdırdı".
Üç ölkə arasında əldə olunan bu razılaşmanın nə kimi əhəmiyyəti var?
İqtisadçı Qulu İsmayılov qəzetimizə açıqlamasında bildirdi ki, Azərbaycan, Qazaxıstan, Gürcüstan, Türkiyə, Çin Xalq Respublikasının dəmir yolu təşkilatlarının birgə təşəbbüsü ilə Transxəzər nəqliyyat dəhlizi layihəsi reallaşdırılır: "Layihə çərçivəsində tranzit və xarici ticarət yüklərinin cəlb edilməsi, həmçinin, yükdaşıma həcminin artırılması məqsədilə rəqabətə davamlı vahid dəmir yolu tarifləri və hərəkətin təşkili yanaşmasının tətbiqi nəzərdə tutulur. Bu marşrutun işə düşməsi üzv ölkələrin ixracat və tranzit potensialının yüksəldilməsinə, beynəlxalq Transxəzər nəqliyyat marşrutunun rəqabət gücünün artırılmasına təkan verəcək. Bilirsiniz ki, bu nəqliyyat dəhlizinin ölkəmiz üçün böyük əhəmiyyəti var. Bununla Azərbaycan həm öz yüklərini dünya bazarına çıxarmaq imkanı qazanacaq, həm də tranzit ölkə kimi böyük mənfəət əldə edəcək. Artıq marşrut üzrə hələlik yalnız bir qatar sınaqdan keçirilib. Bu layihə ilə bağlı ciddi narahatlıq keçirənlər də az deyil. Rusiyanın Azərbaycandakı səfiri Transxəzər nəqliyyat dəhlizi layihəsi ilə bağlı mənfi fikirlər səsləndirib. Səfirə görə, bu marşrut mürəkkəbdir. "Xəzərdəki fırtınaların bir, hətta iki həftəyədək davam etməsini də nəzərə almaq lazımdır. Bundan başqa, marşrutun salındığı Gürcüstan ərazisində dəmir yolu çox mürəkkəb relyef üzərindən keçir. Üçüncüsü, bu layihə Rusiya-Ukrayna münasibətləri fonunda bir qədər siyasiləşdirilib". Ancaq bütün bu etiraz və təzyiqlərə baxmayaraq, ölkəmizin də yer aldığı meqa layihə tam reallaşıb. Artıq bizim bəhrə götürən vaxtımız yetişib".
Məhəmmədəli QƏRİBLİ
